श्री विठ्ठल- रुक्मिणी मंदिरे समिती आवश्यकतेनुसार आऊटसोर्सिंग पद्धतीने कुशल, अर्धकुशल व अकुशल कर्मचारी नियुक्त करणे आवश्यक असल्याने विहित प्रक्रिया राबवून ई-निविदा राबविण्यात आली होती. त्यामध्ये रक्षक सिक्युरिटी सर्व्हिसेस अॅड सिस्टिम्स प्रा. लि., पुणे यांची निविदा मंजूर होऊन ४ जुलै २०२४ रोजी करारनामा करण्यात आला होता. तथापि, त्यांच्याकडून करारनाम्यातील अटी व शर्तीचे पालन होत नसल्याने त्यांचा ठेका रद्द करण्यात आल्याची माहिती कार्यकारी अधिकारी राजेंद्र शेळके यांनी दिली.
कर्मचारी पुरवठा कामामध्ये वारंवार नोटीस देऊनही त्या संदर्भात सुधारणा होत नसल्याचे दिसून आले होते. तसेच त्यांच्या कामाबाबत विविध प्रकारच्या लेखी तक्रारीदेखील प्राप्त झाल्या होत्या. त्यावर मंदिर समितीच्या १० डिसेंबर २०२४ रोजीच्या सभेत चर्चा होऊन पुढील कार्यवाही करण्याचे ठरले होते. त्यानुसार संबंधित कंपनीला अंतिम नोटीस देण्यात आली होती. त्यावर त्यांनी सादर केलेला खुलासा वस्तुस्थितीला धरून व समाधानकारक नाही. मंदिर समितीने फेब्रुवारी २०२४ मंदिर समितीला कर्मचारी पुरवठा करणे कामी ई-निविदा मागविण्यात आल्या होत्या. त्याची अंदाजपत्रकीय रक्कम सुमारे ४ कोटी ५० लाख होती. या प्रक्रियेत १२ पुरवठाधारकाने सहभाग घेतला होता. त्यामध्ये रक्षक कंपनीचा ठेका मंजूर झाला होता.
रक्षक कंपनीने नियुक्त केलेले कर्मचारी हे भाविकांना धक्काबुक्की करतात. कर्मचारी आयडी कार्ड व गणवेश परिधान करीत नाहीत. नेमून दिलेली सेवा व्यवस्थितपणे पार न पाडणे, मंदिरात प्रवेश करणाऱ्या गेटवर भाविकांची तपासणी न करता मोबाईलसह मंदिरात प्रवेश देऊन करारातील अटी शर्तीचा भंग करणे, २५ पैकी फक्त दोन माजी सैनिक नियुक्त करून करारातील अटींचा भंग केला. तसेच, कर्मचाऱ्यांना पेमेंट स्लिप न देणे, सेवेच्या ठिकाणी मोबाईल वापरणे व इतर अनुषंगिक गैरवर्तन करीत असल्याच्या बाबी अनेकवेळा निदर्शनास आलेल्या आहेत. याबाबत अनेकवेळा लेखी व मौखिक सूचना करूनही सुधारणा झाली नाही. याबाबत मंदिर समितीने संस्थेविरुद्ध अनेकवेळा ‘कारणे दाखवा’ नोटीस बजावून व समज देऊनही सुधारणा होत नसल्याने दंडात्मक कारवाईही केली होती.
तथापि, त्यासंदर्भात सुधारणा अथवा कोणतीच कारवाई झाली नाही. हा करार यापुढे सुरू ठेवल्यास मंदिर समितीची प्रतिमा मलिन होईल. त्याचा भाविकांच्या सोईसुविधांवर परिणाम होऊन त्याचा रोष मंदिर समितीवर येऊ शकतो. त्या संदर्भात बातम्या प्रसिद्ध होऊन मंदिर समितीची बदनामी झाली आहे. दि. ४ जानेवारी रोजी ‘भटक्या कुत्र्यांचा मंदिरात मुक्त वावर’, अशा बातम्या प्रसारमाध्यमांत प्रसिद्ध झाल्या आहेत. यावरून त्यांच्याकडील कर्मचारी प्रामाणिकपणे सेवा देत नसल्याचे पुन्हा एखदा दिसून आले. त्यामुळे ही संस्था करारनाम्यातील अटी व शर्तीनुसार कामकाज करू शकत नसल्याने आणि वारंवार नोटीस देऊनही त्या संदर्भात योग्य तो खुलासा व सुधारणा होत नसल्याने, त्यांच्याशी करण्यात आलेला करार रद्द करणे क्रमप्राप्त झाले होते, असे व्यवस्थापक मनोज श्रोत्री यांनी यावेळी सांगितले.
