लग्नापूर्वी नातेसंबंधात असताना सहमतीने ठेवलेले लैंगिक संबंध हे नातेसंबंध संपुष्टात आले म्हणून बलात्कार ठरत नाहीत, असा महत्त्वाचा निर्वाळा कर्नाटक उच्च न्यायालयाने दिला आहे. कर्नाटकमधील एका पुरुषावर महिलेकडून बलात्कार आणि फसवणुकीचा गुन्हा दाखल करण्यात आला होता. यावर सुनावणी करताना कर्नाटक उच्च न्यायालयाच्या एक सदस्यीय खंडपीठाचे न्यायाधीश एम. नागप्रसन्न यांनी हा निकाल दिला. दोघांच्या नातेसंबंधामधील प्रेम कालांतराने कमी होत गेले याचा अर्थ त्यांनी नातेसंबंधात असताना सहमतीने ठेवलेल्या लैंगिक संबंधांना बलात्कार म्हटले जाऊ शकत नाही. तक्रारदार किंवा आरोपी अशा दोघांपैकी कुणाचेही प्रेम कमी झाले तरीही हे लागू होते, असे न्यायालयाने नमूद केले. याचिकाकर्ता आणि आरोपी या दोघांमधील लैंगिक संबंध हे पूर्णपणे सहमतीने ठेवण्यात आलेले होते. या प्रकरणातील आरोपी पुरुष हा तक्रारदार महिलेबरोबर साधारण 2012 साली नातेसंबंधामध्ये आला होता. 2018 मध्ये पुरुषाविरोधात बलात्कार आणि फसवणुकीचा गुन्हा दाखल केला.
10 लाखांसाठी तक्रार; वकिलाचा युक्तीवाद
पुरुषाने फसवणूक केली असून आता तो दुसऱया एका महिलेबरोबर नातेसंबंधात आला असल्याची तक्रार या महिलेने केली होती. परंतु महिलेने केलेले सर्व आरोप फेटाळून लावत. आरोपीच्या वकिलांनी असा युक्तिवाद केला की महिलेने केलेली बलात्काराची तक्रार म्हणजे आरोपीकडून 10 लाख रुपये उकळण्याचा प्रयत्न आहे, असे म्हटले.
तक्रारदाराचे प्रेमसंबंध
आरोपीच्या वकिलांनी असा युक्तिवाद केला की माझ्या अशिलाने महिलेला लग्नाचे वचन कधीच दिलेले नव्हते. मात्र, त्यांच्यामधील शारीरिक संबंध हे सहमतीने ठेवलेले होते. याचिकाकर्ता आणि तक्रारदार यांचे सहा वर्षांपासून शारीरिक संबंध होते.
