चंद्रपूर हा जिल्हा वाघ आणि ‘वारां’चा आहे. सुधीर मुनगंटीवार हे आमचे नेते आहेत, तसेच विजय वडेट्टीवार आणि किशोर जोरगेवार हे आमचे मित्र आहेत. त्यामुळे मी सांगतो की, कुठलेही ‘वार’ असले तरी आम्ही त्यांचा सन्मान करतो. कारण आम्ही हेडगेवारांचे अनुयायी आहोत. त्यामुळे ‘वार’ हे आडनाव आल्याबरोबर आमचे हात नेहमी पुढे असतात… मुख्यमंत्री देवेंद्र फडणवीस यांनी आज केलेल्या कोटीमुळे कार्यक्रमात चांगलीच रंगत आली.
कर्मवीर मारोतराव कन्नमवार यांची 125 वी जयंती चंद्रपूर येथे साजरी करण्यात आली. या कार्यक्रमाच्या निमित्ताने मुख्यमंत्री देवेंद्र फडणवीस, काँग्रेसचे नेते विजय वडेट्टीवार, भाजप आमदार किशोर जोरगेवार एका व्यासपीठावर आले होते. मात्र भाजप नेते सुधीर मुनगंटीवार या कार्यक्रमाला उपस्थित नव्हते. सुधीर मुनगंटीवार यांचा मंत्रिमंडळात समावेश केलेला नाही. याच नाराजीतून ते या कार्यक्रमाला उपस्थित नसल्याची चर्चा होती. व्यासपीठावरील नेत्यांनी केलेल्या शाब्दिक कोटय़ा आणि राजकीय टिप्पणी व टोमण्यांनी कार्यक्रमात मात्र रंगत आली.
फडणवीसांनी मोदींचे वारसदार व्हावे
या वेळी काँग्रेस नेते विजय वडेट्टीवार म्हणाले, खरेतर त्या वेळी यशवंतराव चव्हाण यांचे राजकीय वारसदार म्हणून आम्ही कर्मवीर मारोतराव कन्नमवार यांच्याकडे पहायचो आणि ते नंतर मुख्यमंत्रीदेखील झाले. आता तुमच्याकडे कर्तृत्व आहे, कार्य करण्याची क्षमता आणि हिंमत आहे. त्यामुळे आता तुम्हीसुद्धा नरेंद्र मोदी यांचे वारसदार व्हावे. ते स्वाभाविक आहे. त्यात काही वेगळे नाही. पुढे बोलताना विजय वडेट्टीवार यांनी भाजप आमदार किशोर जोरगेवार यांनादेखील टोला लगावला. किशोर जोरगेवार यांनी या दोन्ही जिह्यांच्या विकासासाठी जो प्रस्ताव मांडला त्याला मी अनुमोदनही देतो. खरेतर तुम्ही बाजूची खुर्ची घेण्यात फार पटाईत आहात. राजकारणात हे कौशल्य, काही गोष्टी ज्युनियरकडून सीनियरला शिकाव्या लागतात. ते मी किशोर जोरगेवार यांच्याकडून येथे आल्यापासून शिकलो, अशी टोलेबाजी विजय वडेट्टीवार यांनी केली आहे. त्यावर मुनगंटीवार, जोरगेवार, हेगडेवार अशा आडनावांचा उल्लेख करीत चंद्रपूर हा जिल्हा वाघ आणि ‘वारां’चा आहे अशी टिप्पणी करीत देवेंद्र फडणवीस यांनी कार्यक्रमात अधिकच रंगत आणली.
