उत्तर प्रदेशमध्ये होणाऱ्या महाकुंभमध्ये चेंगराचेंगरी झाली. यात अनेक भाविक जखमी झाले आहेत. ही दुर्घटना नेमकी कशी झाली यावर मुख्यमंत्री योगी आदित्यनाथ यांनी महत्त्वाची माहिती दिली आहे. मुख्यमंत्री योगी आदित्यनाथ म्हणाले की, रात्री एक ते दोन वाजण्याच्या दरम्यान आखाडा मार्गावर काही भाविक बॅरिकेड्स ओलांडून आत येण्याचा प्रयत्न करत होते. तेव्हा काही भाविक जखमी झाले. या जखमी भाविकांना तत्काळ रुग्णालयात दाखल करण्यात आलं. त्यातील काही भाविक हे गंभीर जखमी झाले होते.
या महाकुंभसाठी जवळपास 8 ते 10 कोटी भाविक आल्याचे मुख्यमंत्री योगी आदित्यनाथ यांनी सांगितले. काल साडे पाच कोटी भाविकांनी महाकुंभमध्ये स्नान केले. संगम नोजवर मोठ्या प्रमाणात भाविक आल्याने मोठी गर्दी झाली आहे. प्रशासनाने सर्व जखमींना रुग्णालयात दाखल केले असून सर्वांवर उपचार सुरू आहेत. महाकुंबमध्ये झालेल्या या चेंगराचेंगरीमुळे अफवा पसरल्या जात आहेत. लोकांनी सतर्क राहण्याचे आवाहनही त्यांनी केले आहे.
प्रयागराजमध्ये मौनी अमावस्येनिमित्त प्रशासनाने तयारी केली होती अशी माहिती मुख्यमंत्री योगी आदित्यनाथ यांनी दिली होती. पंतप्रधान नरेंद्र मोदी, केंद्रीय गृहमंत्री अमित शहा, भाजप अध्यक्ष जे. पी. नड्डा आणि राज्यपाल आनंदीबेन पटेल यांनी भाविकांवाबाबत माहिती घेत आहेत. दुसरीकडे महाकुंभमध्ये चेंगराचेंगरी झाल्याने संपूर्ण प्रशासन हाय अलर्टवर आहे. चेंगराचेंगरी झाल्यानंतरही मौनी अमावस्येसाठी लोकांनी गर्दी केली आहे.
