केरळमधील एका खासगी देखभाल गृहात कॉलराचा उद्रेक झाल्याची नोंद झाली आहे. या रोगाचा प्रसार रोखण्यासाठी राज्याच्या आरोग्य विभागानं उपाय योजना सुरू केल्या आहेत.
राज्याच्या आरोग्य मंत्री वीणा जॉर्ज यांनी दिलेल्या माहितीनुसार, ही घटना तिरुअनंतपुरमच्या नेयट्टींकारा भागात घडली आहे.
रोगाच्या उद्रेकानंतर, जिल्हा वैद्यकीय अधिकाऱ्यांच्या नेतृत्वाखाली नेयट्टिनकारा भागात प्रतिबंधात्मक उपाययोजना तीव्र करण्यात आल्या, अशी माहिती त्यांनी दिली आहे.
मंत्र्यांच्या निर्देशानंतर आरोग्य सेवा विभागाच्या अतिरिक्त संचालकांनीही घटनास्थळी भेट देऊन परिस्थितीची पाहणी केली.
आरोग्य विभागाच्या प्रसिद्धीनुसार, सुरुवातीला केअर होमच्या रहिवाशांना अन्नातून विषबाधा झाल्याचा संशय होता. मात्र, या आजाराची माहिती मिळताच पेरुंपझुथूर प्राथमिक आरोग्य केंद्राच्या वैद्यकीय अधिकाऱ्यांनी तातडीने प्रतिसाद देत आवश्यक उपाययोजना केल्या.
रोगाचे स्त्रोत ओळखण्यासाठी पाण्यासह नमुने तपासणीसाठी पाठविण्यात आले आहेत, असे आरोग्य विभागाच्या निवेदनात म्हटले आहे.
लक्षणे दिसणाऱ्यांचे नमुने लवकरात लवकर तपासणीसाठी पाठवावेत, असे निर्देश देखील आरोग्यमंत्र्यांनी दिले आहेत.
कॉलरा रूग्णांवर उपचार करण्यासाठी इराणीमुत्तम हॉस्पिटलच्या आयसोलेशन वॉर्डमध्ये सुविधांची व्यवस्था करण्यात आली आहे.
आरोग्य विभागाच्या नोट मध्ये म्हटले आहे की केअर होममधील काही जण त्यांच्या घरी परतले आहेत आणि त्यांचे निरीक्षण केले जाईल. त्यांना किंवा त्यांच्या कुटुंबातील सदस्यांना लक्षणे आढळल्यास, त्यांच्या नमुन्यांची चाचणी केली जाईल आणि उपचार दिले जातील.
संस्थेशी संलग्न असलेल्या शाळेतील काही मुलांमध्ये कॉलराची लक्षणे देखील दिसून आली आहेत आणि त्यांची तज्ज्ञांच्या देखरेखीत काळजी घेतली जाईल. शाळेतही प्रतिबंधात्मक उपाय करण्यात आले आहेत, अशी माहिती प्रसिद्धीपत्रकाद्वारे देण्यात आली आहे.
कॉलरा रोखण्यासाठी जनजागृती महत्त्वाची आहे, यावर आरोग्य विभागाने भर दिला.
‘गंभीर अतिसार, उलट्या होणे किंवा शरीरातील पाण्याचं प्रमाण कमी होणे यांसारखी लक्षणे आढळल्यास, त्वरित वैद्यकीय उपचार घेणे आवश्यक आहे. व्हिब्रिओ कोलेरा या जीवाणूमुळे होणारा एक अत्यंत संसर्गजन्य रोग, कॉलरावर उपचार करण्यासाठी प्रभावी प्रतिजैविक उपलब्ध आहेत’, असेही त्यात म्हटले आहे.
उपचार न केल्यास हा आजार वेगाने पसरू शकतो. जरी लक्षणे कमी झाली, तरीही रुग्णाला अनेक दिवस रोगाचा प्रसार होऊ शकतो, असे सांगत आरोग्य विभागाने सावध केले आहे.
हा रोग विशेषत: दूषित पाणी आणि अन्नाद्वारे पसरतो. हे जीवाणू शरीरात प्रवेश करू शकतात आणि काही तासांपासून ते पाच दिवसांत रोगास कारणीभूत ठरू शकतात, असेही त्यात म्हटले आहे.
