‘अतिथी तुम कब जाओगे’, ‘सन ऑफ सरदार’ यासारख्या चित्रपटांचे दिग्दर्शन करणारे बॉलिवूड दिग्दर्शक अश्विनी धीर यांच्यावर दुःखाचा डोंगर कोसळला आहे. अश्विन यांचा 18 वर्षांचा मुलगा जलज धिर याचे कार अपघातात निधन झाले आहे. जलज हा त्याच्या अन्य तीन मित्रांसोबत कारमधून प्रवास करत असताना हा अपघात झाला. यात जलजसह त्याच्या एका मित्राचे निधन झाले. पोलिसांनी कारचा चालक आणि जलजचा मित्र साहिल मेंढा याला अटक केली आहे.
मिळालेल्या माहितीनुसार, जलज आणि त्याचे तीन मित्र साहिल, सार्थक आणि जिमी पहाटे 3.30 वाजेपर्यंत त्याच्या घरी व्हिडिओ गेम खेळत होते. त्यानंतर चौघेही वांद्र्यातील सिदगी येथे जेवायला गेले. मग 4.10 च्या सुमारास तेथून निघाले. यावेळी साहिलचे गाडीवरील नियंत्रण सुटल्याने विलेपार्ले येथील सर्व्हिस रोड आणि पुलाच्या दरम्यान दुभाजकाला धडकली.
यात जलज आणि सार्थक गंभीर जखमी झाले तर जिमी किरकोळ जखमी झाला. जिमीने घटनास्थळी उपस्थित दोघांच्या मदतीने जलजला आधी ट्रॉमा केअर मग कोकिलाबेन अंबानी रुग्णालयात नेले. मात्र डॉक्टरांनी त्याला मृत घोषित केले. तर साहिलने सार्थकला भाभा रुग्णालयात नेले, तेथे त्यालाही मृत घोषित करण्यात आले आहे. याप्रकरणी जिमीने पोलिसात तक्रार दाखल केली. तक्रारीनंतर साहिल मेंढा याला अटक केली.
