केंद्रीय मंत्री आणि उत्तर प्रदेशातील पिलीभीत मतदारसंघाचे भाजपचे खासदार जितीन प्रसाद हे अपघातात जखमी झाले आहेत. केंद्रीय मंत्री जितीन प्रसाद हे पिलीभीत या आपल्या मतदारसंघाच्या दौऱ्यावर होते. यावेळी मंत्री जितीन प्रसाद यांची कार त्यांच्यात ताफ्यातील एका कारला धडकली. यात जितीन प्रसाद यांच्यासह त्यांचा पीए आणि खानसामा जखमी झाले. यानंतर मंत्री जितीन प्रसाद यांनी अपघातग्रस्त कार तिथेच सोडली आणि दुसऱ्या वाहनातून रवाना झाले.
हा अपघात मझोला-विज्टी रस्त्यावर बहरुआ गावात झाला. या अपघातात जितीन प्रसाद यांच्या डोक्याला किरकोळ दुखापत झाली. ताफ्यातील कार वेगात असल्याने जोरदार धडक बसली. या अपघातात मंत्री जितीन प्रसाद यांच्या कारचे मोठे नुकसान झाले.
मंत्री जितीन प्रसाद हे आपल्या मतदारसंघाच्या दौऱ्यावर होते. यावेळी त्यांच्या ताफ्यात असलेल्या एस्कॉर्ट कारने अचानक ब्रेक लावला. त्यामागे असलेली जितीन प्रसाद यांची कारही थांबली. पण मागून येणाऱ्या कारच्या चालकाला गाडी नियंत्रित करता आली नाही आणि त्याने जोरदार धडक दिली. या अपघातात मंत्री जितीन प्रसाद हे किरकोळ जखमी झाले. त्यांच्या डोक्याला किरकोळ जखम झाली. या अपघातानंतर मंत्री दुसऱ्या कारने आपल्या कार्यक्रम स्थळाकडे रवाना झाले.
