गुरु-शिष्याच्या नात्याला काळीमा फासणारा धक्कादायक प्रकार समोर आला आहे. शिक्षकाने एका शाळेतील विद्यार्थिनीकडे विचित्र मागणी केली आहे. शिक्षकाने विद्यार्थिनीला त्याची गर्लफ्रेंड बनण्याची ऑफर दिली. एवढेच नाही तर तिच्यासोबत अश्लील बोलण्याचा प्रयत्नही केला. दरम्यान, विद्यार्थिनीने या संपूर्ण प्रकाराबाबत शाळेच्या मुख्याध्यापकांकडे तक्रार केली. पण अद्यापही या शिक्षकावर कोणतीही कारवाई झालेली नाही.
बिहारच्या किसनगंज तालुक्यातील किसान उच्च विद्यालयात हा प्रकार घडला. विकास कुमार असे त्या शिक्षकाचे नाव आहे. या शिक्षकाने गुरु-शिष्यातील पवित्र नात्याच्या मर्यादा ओलांडल्या आहेत. या नराधमाने 12 वीत शिकणाऱ्या विद्यार्थिनीला फोन कॉल करून आपली प्रेयसी होण्याची मागणी केली. एवढेच नाही तर माझ्यासोबत सिलीगुडीला फिरण्यासाठी चल, असेही म्हणाला.
शिक्षकाने फोनवर बोलताना विद्यार्थिनीला महाभारतातील धनुर्धारी एकलव्याचे उदाहरण दिले. ज्याप्रमाणे द्रोणाचार्य यांना प्रसन्न करण्यासाठी एकलव्याने त्यांच्या उजव्या हाताचा अंगठा वेगळा केला होता. हीच द्रोणाचार्यांची गुरूदक्षिणा होती. त्याचप्रमाणे माझी गुरूदक्षिणा म्हणून विद्यार्थिनीला गर्लफ्रेंड बनण्याची ऑफर दिली. तसेच सिलीगुडीला सोबत फिरण्याचीही मागणी केली. हे सगळे संभाषण विद्यार्थिनीने मोबाईल फोनमध्ये रेकॉर्ड करून शाळेच्या मुख्याध्यापकांना दाखवले. शिक्षकच्या अश्लिल वर्तणूकीमुळे शिक्षण क्षेत्रात खळबळ उडाली आहे.
दरम्यान, शाळेचे मुख्याध्यापक शफिक अहमद यांनी याप्रकणाची तक्रार किशनगंजचे डीएम विशाल राज यांच्याकडे केली आहे. डीएम विशाल राज यांनी संपूर्ण प्रकरण गांभीर्याने घेतले आहे. याप्रकरणी चौकशीनंतर कठोर कारवाई केली जाईल असे सांगितले.
