मुंबईतील कंत्राटी कामगारांच्या आंदोलनामुळे शहरातील बेस्ट सेवेत मोठ्या प्रमाणावर गोंधळ निर्माण झाला आहे. त्यामुळे प्रवाशांची तारांबळ उडाली असून प्रवाशांना प्रवास करताना मोठ्या अडचणींचा सामना करावा लागत आहे.
बेस्ट बसने दररोज लाखोंच्या संख्येने प्रवासी प्रवास करत असतात. शाळेत जाणारे विद्यार्थी, कामावर जाणारे चाकरमानी आणि मुंबई दर्शनासाठी येणारे पर्यटक सुद्धा बेस्ट बसने प्रवास करण्याला प्राधान्य देतात. परंतु बेस्ट बसच्या कंत्राटी कामगारांनी विविध मागण्यांसाठी आंदोलन सुरू केल्यामुळे प्रवशांची मोठी गैरसोय होत आहे. बसस्टॉपवर प्रवशांच्या रांगा लागल्या आहेत. त्यामुळे घड्याळाच्या काट्यावर चालणाऱ्या मुंबईकरांच्या वेळेचे गणित कोलमडले आहे. आपल्या गंतव्यस्थानावर पोहचण्यासाठी प्रवशांना अनेक तास उभे रहावे लागत आहे. कंत्राटी कामगारांच्या आंदोलनामुळे शहारातील सार्वजनिक वाहतूक व्यवस्थेवर याचा गंभीर परिणाम झाला आहे.
