मराठा आरक्षणासाठी (Maratha Reservation) लढा देणाऱ्या मनोज जरांगे (Manoj Jarange Patil) यांनी आज आपलं उपोषण अखेर स्थगित केलं आहे. सरकारचे प्रतिनिधी म्हणून अंतरवाली सराटीत आलेल्या आमदार सुरेश धस यांच्याहस्ते ज्यूस पिऊन त्यांनी आपलं उपोषण स्थगित केलं. मात्र उपोषण स्थगित करताना मनोज जरांगे यांनी राज्य सरकारला पुन्हा एकदा इशारा दिला आहे. ‘मागण्या मान्य करा अन्यथा पुन्हा मुंबई गाठणार’, असा इशारा त्यांनी सरकारला दिला. तसेच आता उपोषण नाही, तर समोरासमोरची लढाई होणार, असंही यावेळी ते म्हणाले आहेत.
उपोषण स्थगित करताना मनोज जरांगे पाटील म्हणाले की, ”हे अंदोलन आपण स्थगित करत आहोत.” ते म्हणाले, आता उपोषण होणारच नाही. आता समोरासमोरची लढाई होणार.” जरांगे म्हणाले, मला 100 टक्के असं वाटत आहे की, देवेंद्र फडणवीस मराठ्यांशी बेईमानी आणि गद्दारी करणार नाही. ते मराठ्यांच्या सगळ्या मागण्यांची अंमलबजावणी करतील. त्यांनी हे नाही केलं तर मराठ्यांची बैठक बोलवून आम्ही लवकरच मुंबईला जाण्याची तयारी करणार आहोत.”
