ऑगस्ट महिन्यात आलेल्या महापुरात ट्रॅक्टर-ट्रॉली पाण्यात पलटी होऊन झालेल्या अपघातात बुडालेले अकिवाट येथील माजी जिल्हा परिषद सदस्य इक्बाल बाबासो बैरागदार (वय 56) यांचा मृतदेह चार महिन्यांनंतर कर्नाटकातील इंगळी (ता. चिकोडी, जि. बेळगाव) येथे कृष्णा नदीच्या पात्रात सापडला. मृतदेहाजवळ सापडलेल्या मोबाईल, सुपारीच्या डब्याने आणि कपड्यांवरील खुणांवरून कुटुंबीयांनी त्यांची ओळख पटवली.
2 ऑगस्ट 2024 बैरागदार आणि त्यांचे सहकारी ट्रॅक्टरने बस्तवाड शेताकडे जात असताना, पुलावरून ट्रॅक्टर नदीत कोसळला होता. अपघातात चारजण बचावले, तर सुहास पाटील यांचा उपचारादरम्यान मृत्यू झाला. अण्णासाहेब हसुरे आणि इक्बाल बैरागदार वाहून गेले होते. हसुरे यांचा मृतदेह घटनेनंतर तीन दिवसांत सापडला. मात्र, बैरागदार यांचा शोध लागला नव्हता.
शासनाने शोधमोहीम थांबवल्यानंतर बैरागदार यांचे नातेवाईक खचले नाहीत. त्यांनी चार महिन्यांपासून कृष्णा नदीकाठावर पत्रके वाटणे, प्रसिद्धिमाध्यमांतून माहिती देणे आणि चौकशी करणे, असे प्रयत्न सुरू ठेवले. दरम्यान, मंगळवारी कर्नाटकातील देसाई इंगळी गावच्या नदीकाठच्या शेतात ऊसतोड सुरू असताना त्यांचे मानवी अवशेष आढळून आले. अवशेषाजवळ सापडलेले मोबाईल आणि कपडे यावरून बैरागदार यांची ओळख पटली.
बैरागदार कुटुंबाची आतुरता अखेर संपली
इंगळी येथे मृतदेह सापडल्याचे समजताच, नातेवाईकांनी ओळख पटवली. बैरागदार यांच्या मृतदेहावर अकिवाट येथे अंत्यसंस्कार होणार आहेत. मृतदेह मिळाल्याने धार्मिक विधी पूर्ण करण्याचे समाधान मिळाले असले, तरी या घटनेने कुटुंबीय व मित्रपरिवार दुःखमग्न झाले आहेत.
