नावीन्याचा ध्यास घेऊन वेगवेगळे प्रयोग करण्यासाठी प्रसिद्ध असलेले दिग्दर्शक समित कक्कड हे मराठी सिनेसृष्टीत ‘रानटी’ हा धडाकेबाज अॅक्शनपट घेऊन येतायेत. पुनित बालन स्टुडिओनिर्मित आणि समित कक्कड दिग्दर्शित ‘रानटी’ हा मराठीतला सगळ्यात मोठा अॅक्शनपट असणार आहे. अॅक्शनचे बादशहा असणारे प्रसिद्ध बॉलीवूड दिग्दर्शक रोहित शेट्टी यांनी या चित्रपटाचा जबरदस्त ट्रेलर प्रदर्शित केला आहे.
जेव्हा माणसातील रानटी शक्ती इतकी प्रबळ होते की, माणसातील चांगले गुण नाहीसे होत थैमान घालणारी माणसं दिसू लागतात. याच थैमान शक्तीला आवरण्यासाठी काहीजणांना रानटी व्हावे लागते. या दशकातील सर्वात मोठा ‘अँग्री यंग मॅन’ दिग्दर्शक समित कक्कड 22 नोव्हेंबरला आपल्या भेटीला घेऊन येणार आहेत. दमदार व्यक्तिरेखा, अॅक्शन, इमोशन्स, सूडनाट्य असा जबरदस्त मसाला असलेला हा धमाकेदार चित्रपट असल्याचे दिग्दर्शक समित कक्कड सांगतात. पुनित बालन म्हणाले, मराठीत अॅक्शन, ड्रामा, इमोशनचा पुरेपूर मसाला असलेले चित्रपट क्वचितच दिसतात. त्यामुळे प्रेक्षकांना आवडेल असं काहीतरी हटके मसालेदार विषय घेऊन येण्याचा आमचा मानस होता. मराठीत एक वेगळा प्रयत्न ‘रानटी’ चित्रपटाच्या निमित्ताने केला आहे आणि तो प्रेक्षकांना नक्कीच आवडेल, असा विश्वासही त्यांनी व्यक्त केला.
भगवान विष्णूंचा सर्वात उग्र अवतार म्हणून नरसिंह अवतार ओळखला जातो. पातळपुरातील अशाच अधर्मी वृत्तीचा नाश करण्यासाठी विष्णू येतोय. याच विष्णूचा दमदार अवतार ट्रेलरमध्ये पाहायला मिळतोय. भारदस्त व्यक्तिमत्त्व असलेले अभिनेते शरद केळकर ‘रानटी’ मध्ये शीर्षक भूमिकेत आहे. याबरोबरच संजय नार्वेकर, संतोष जुवेकर, नागेश भोसले, जयवंत वाडकर, संजय खापरे, छाया कदम, अक्षया गुरव, कैलास वाघमारे, माधव देवचक्के, सुशांत शेलार, हितेश भोजराज, सानवी श्रीवास्तव, नयना मुखे अशी तगडी स्टारकास्ट या चित्रपटात पाहायला मिळणार आहे. ‘रानटी’ चित्रपटासाठी ऋषिकेश कोळी यांचं लिखाण, अजित परब यांचं संगीत, अमर मोहिले यांचं पाश्र्वसंगीत आहे. एझाज गुलाब यांची साहसदृश्ये आणि सेतू श्रीराम यांचं छायाचित्रण असून, आशीष म्हात्रे यांनी संकलन केले आहे.
