मुंबईकरांचे आराध्य दैवत असलेल्या प्रभादेवी येथील श्री सिद्धिविनायकाच्या चरणी भक्तांनी अर्पण केलेल्या सोन्याच्या अलंकारांचा लिलाव गुढीपाडव्याच्या शुभमुहूर्तावर रविवार 30 मार्च रोजी सकाळी 11 ते सायंकाळी 5 या कालावधीत मंदिराच्या आतील परिसरात आयोजित करण्यात आला आहे. लिलावासाठी उपलब्ध असलेले श्रीगणेश प्रतिमा, लॉकेट्स, मोदक, अंगठय़ा, सोन्याच्या साखळ्या, हार आदी अलंकार लिलावाच्या दिवशी मंदिराच्या आवारात प्रदर्शनार्थ ठेवण्यात येतील. या लिलावात भारत सरकार टांकसाळ यांच्याकडून बनवून घेतलेली श्री सिद्धिविनायकाची प्रतिमा असलेली 999 प्रतीची शुद्ध चांदीची नाणी 11 ग्रॅम, 21 ग्रॅम, 51 ग्रॅम वजनाची विक्रीकरिता उपलब्ध आहेत. लिलाव व नाणी विक्री संबंधीचे सर्व अधिकार न्यासाने राखून ठेवलेले आहेत. श्री सिद्धिविनायकाच्या भक्तांनी या लिलावात मोठय़ा संख्येने सहभागी व्हावे, असे आवाहन न्यास व्यवस्थापन समितीने केले आहे.
