राष्ट्रीय शिक्षण धोरण 2020 च्या अनुषंगाने नॅक मुल्यांकित A + श्रेणी असणाऱ्या सायन कोळीवाड्यातील स्वायत गुरू नानक महाविद्यालयात परफॉर्मिंग आर्ट्स कमिटीच्या नेतृत्वाखाली ‘कला उत्सव 2025’ हा सोहळा 600 हून अधिक प्रेक्षकांच्या उपस्थितीत पार पडला. या सोहळ्यात गायन, नृत्य व फॅशन शो चे आयोजन करण्यात आले होते. 70 पेक्षाही अधिक विद्यार्थ्यांनी या सोहळ्यात आपली कला महाविद्यालयाच्या सभागृहात सादर केली.
“विद्यार्थ्यांचा व्यक्तिमत्व विकास करणं ही शिक्षक म्हणून आमची जबाबदारी आहे. शिक्षक म्हणून समाजात वावरत असताना विद्यार्थांना एक चांगला माणूस बनवणं हे आपल्या केवळ शिक्षकांच्या हातात आहे. त्यासाठी विविध व्यासपीठ आम्ही विद्यार्थांना नेहमीच देत असतो त्यांच्या यशातच आमचं समाधान दडलेलं आहे.” असे प्रतिपादन प्राचार्या डॉ. पुष्पिंदर भाटिया यांनी केले. या इंट्रा कॉलेजिएट स्पर्धेसाठी परीक्षक म्हणून अतुल पडवळ (गायन स्पर्धा), सिद्धार्थ माळकर (नृत्य स्पर्धा) व रोहन जोशी (फॅशन शो स्पर्धा) यांनी धुरा सांभाळली. प्राचार्या डॉ. पुष्पिंदर भाटिया यांच्या मार्गदर्शनाखाली पी.एस.सी चे अध्यक्ष प्रा. संगम शंकर कोळी यांनी व त्यांच्या टीमने कला उत्सव यशस्वीरीत्या पार पाडला.
