राज्यातील ज्येष्ठ नागरिकांना तीर्थस्थळांचे दर्शन घडविण्यासाठी ‘मुख्यमंत्री तीर्थदर्शन योजना’ सुरू करण्यात येणार असून याचा लाभ सर्वधर्मीयांना घेता येईल, अशी घोषणा मुख्यमंत्री एकनाथ शिंदे यांनी आज केली.
विधानसभेत लक्षवेधी सूचनेच्या माध्यमातून राज्यात ‘मुख्यमंत्री तीर्थदर्शन योजना’ लागू करण्याची मागणी करण्यात आली होती. त्यावरील चर्चेला उत्तर देताना मुख्यमंत्री एकनाथ शिंदे यांनी आपला महाराष्ट्र संतांची भूमी असून दरवर्षी अनेक जण तीर्थस्थळांना भेटी देतात. ज्येष्ठ नागरिकांना तीर्थस्थळांचे दर्शन सुलभपणे होण्यासाठी ‘मुख्यमंत्री तीर्थदर्शन योजना’ सुरू करण्यात येणार आहे.
या योजनेसाठी सर्वंकष धोरण तयार करून त्याची नियमावली केली जाईल. त्याअंतर्गत ऑनलाईन अर्ज मागवून ही योजना राबविण्यात येईल, असेही त्यांनी स्पष्ट केले.
