दूध, पनीर आणि तत्सम अन्नपदार्थात होणारी भेसळ ही अतिशय गंभीर बाब आहे. त्यामुळे लोकांच्या जिवाला धोका निर्माण होतो. हे खपवून घेतले जाणार नाही. दूध आणि तत्सम अन्नपदार्थांमध्ये भेसळ करणाऱ्यांवर मकोका अंतर्गत कडक कारवाई करण्यासाठी सध्याच्या कायद्यात आवश्यक त्या सुधारणा करण्यात येतील. त्यासंबंधीचा प्रस्ताव मंत्रिमंडळासमोर सादर करावा, असे निर्देश उपमुख्यमंत्री अजित पवार यांनी आज दिले.
एनालॉग चीज हा पदार्थ राज्यात अनेक ठिकाणी एनालॉग पनीर या नावाने विक्री होत असल्याबाबत तसेच सोलापूर जिह्यातील पंढरपूर तालुक्यातील भोसे येथे उघडकीस आलेल्या बनावट पनीरच्या संदर्भात आमदार विक्रम पाचपुते यांनी विधानसभेत लक्षवेधी सूचना मांडली होती. त्या वेळी झालेल्या चर्चेच्या वेळी दिलेल्या आश्वासनानुसार उपमुख्यमंत्री अजित पवार यांच्या अध्यक्षतेखाली विधान भवनातील समिती कक्षात बैठक पार पडली.
दुधातील भेसळ रोखण्यासाठी अन्न व औषध प्रशासन विभागाला अत्याधुनिक तंत्रज्ञान व यंत्रसामुग्री खरेदी करण्यासाठी पुरवणी मागण्यांमध्ये आणखी निधी देण्यात येईल, अशी ग्वाही अजित पवार यांनी यावेळी दिली.
तक्रारीसाठी टोल फ्री क्रमांक
दुधातील भेसळ तपासण्यासाठी तातडीने प्रत्येक विभागात एक प्रयोगशाळा सुरू करावी, पनीरमध्ये एनालॉग चीज असल्यास त्यासंबंधीची माहिती दुकानात दर्शनी भागात लावण्यासंदर्भात सूचना द्याव्यात. दूध भेसळीसंदर्भात जनजागृती करण्यात यावी, भेसळीसंदर्भात जनतेला तक्रारी नोंदविण्यासाठी टोल फ्री क्रमांक योग्य प्रकारे कार्यान्वित करावा, पोर्टल विकसित करावे, असे निर्देश अजित पवार यांनी दिले. सोलापूर दूधभेसळ प्रकरणातील आरोपींवर कडक कारवाई करण्याचे आदेश त्यांनी दिले.
