पुणे जिल्हा परिषद मुख्यालयात आज चक्क नोटा उधळल्या. जिल्ह्यातील एका ग्रामपंचायत कर्मचाऱ्याने झेडपीच्या नोकरभरतीत जिल्हा परिषदेने अन्याय केल्याचा आरोप करत, जिल्हा परिषदेच्या मुख्य प्रवेशद्वारासमोर आतील बाजूस मोकळ्या जागेत नोटा उधळताना संबंधित कर्मचाऱ्याने स्वतःच्या गळ्यातही नोटांचा हार घातला होता. उधळलेल्या दहा आणि वीस रुपयांच्या नोटांची संख्या जास्त होती.
जिल्हा परिषदेच्या बांधकाम विभागातील तीन वरिष्ठ अधिकाऱ्यांना लाच स्वीकारताना रंगेहाथ पकडल्याचे प्रकरण ताजे असतानाच नोटा उधळण्याची घटना घडल्याने हा चर्चेचा विषय झाला
मावळ तालुक्यातील खडकाळा ग्रामपंचायतीचा हा कर्मचारी असून, अनिल सिरसाट असे या कर्मचाऱ्याचे नाव आहे. नोटा उधळल्यानंतर काही काळ सिरसाठ हे आंदोलनस्थळी ठाण मांडून बसले होते. दरम्यान, दुपारी पोलिसांनी त्यांना उधळलेल्या नोटांसह ताब्यात घेतले. रिक्त जागांपैकी 10 टक्के जागा ग्रामपंचायत कर्मचाऱ्यांसाठी राखीव असतात. यानुसार या कर्मचाऱ्याचा सेवाज्येष्ठता यादीत 34 वा क्रमांक आहे. मात्र, या नोकर भरतीत सन 2021-22 या नोकर भरती वर्षात अन्याय झाल्याचा आरोप सिरसाट यांनी केला आहे.
अनिल सिरसाट यांनी ग्रामपंचायत कर्मचारी कोट्यातून झालेल्या भरतीत अन्याय झाल्याचा दावा केला आहे. यासाठी त्यांनी मंत्रालयातही आंदोलन केले आहे. त्यांच्यावर आंदोलनाचा गुन्हा दाखल आहे. अपात्र असूनही नियुक्ती मिळण्यासाठी दबाव निर्माण करण्याचा प्रयत्न आहे.
विजयसिंह नलावडे, उपमुख्य कार्यकारी अधिकारी (ग्रामपंचायत विभाग)
