शरद पवार यांच्या वयाचा विचार करता त्यांनी आवाहन केल्याप्रमाणे लोकसभेला पवार साहेबांचं तुम्ही सगळ्यांनी ऐकलं. लोकसभेच्या काळात जर काही झालं, तर ते कोणाला आवडणार नाही. या सर्वांचा विचार करून तुम्ही पद्धतशीर आमचा कार्यक्रम केला. जयंत पाटलांच्या भाषेत सांगायचं झालं तर, करेक्ट कार्यक्रम केला. आम्ही पण तो कार्यक्रम स्वीकारला. अशी मिश्कील टिप्पणी उपमुख्यमंत्री अजित पवारांनी केली.
अजित पवार यांनी बारामती तालुक्यातील वानेवाडी येथील ग्रामस्थांशी संवाद साधला. ते म्हणाले, लोकसभेला अनेकांनी काय काय केलं, हे सर्व बूथ बघितल्यावर लक्षात येतं. आता मात्र मी तुमच्याकडे हक्काने आलो आहे. मी ज्या वेळेस तुमची आमदारकी स्वीकारली, तेव्हापासून जास्तीत जास्त काम करण्याचा प्रयत्न केला आहे. मी कुठेही आळशीपणा दाखवला नाही. मी कुठेही कामात व निधी देण्यात कमी पडलो नाही.
