ईव्हीएमच्या विरोधात सोलापूर जिल्ह्यातील मारकडवाडीवासीयांनी काही दिवसांपूर्वी मोठे आंदोलन छेडले होते. त्यानंतर सर्वत्र उद्रेक निर्माण झाला. ईव्हीएम नकोच अशी भूमिका घेऊन महाराष्ट्रात ठिकठिकाणी मोर्चे काढण्यात आले. जव्हार तालुक्यातील झाप ग्रामपंचायतीनेदेखील जोरदार ‘थप्पड’ लगावत बॅलेटवरच पुढील निवडणुका घ्या, अशी भूमिका घेतली. आता वसईतील टिवरी ग्रामपंचायतीनेही ईव्हीएम मशीनच्या विरोधात दंड थोपटले आहेत. एवढेच नव्हे तर ग्रामपंचायतीची निवडणूक ईव्हीएम मशीन नव्हे तर बॅलेट पेपरवरच घेऊ, असा एकमुखी ठराव मंजूर केला आहे. असा निर्णय घेणारी टिवरी ही पालघर जिल्ह्यातील दुसरी ग्रामपंचायत ठरली आहे.
टिवरी ग्रामपंचायतीची शुक्रवारी झालेली ग्रामसभा महत्त्वाची ठरली आहे. या सभेचे अध्यक्षपद उपसरपंच नूतनकुमार भोईर यांनी भूषवले तर माजी उपसरपंच नंदकुमार चौधरी हे या ठरावाचे सूचक होते. ग्रामस्थांनी एकमताने ईव्हीएम हटावचा नारा दिला आणि बॅलेटपेपरच्या माध्यमातूनच मतदान घेण्याचे ठरवले. या ऐतिहासिक ठरावाला गावचे पोलीस पाटील अजित भोईर यांनीही अनुमोदन दिले आहे. पालघर जिल्ह्यात हा दुसरा ऐतिहासिक निर्णय घेण्यात आला आहे.
टिवरी ग्रामपंचायतीने घेतलेला हा निर्णय पालघर जिल्ह्यातील इतर ग्रामपंचायतींनाही प्रेरणा देईल, अशी अपेक्षा वर्तवण्यात येत आहे. हा ठराव मंजूर झाल्यानंतर जिल्हाभरात त्यावर चर्चा सुरू झाली असून इतर गावांनीही असाच निर्णय घ्यावा, असा विचार केला जात आहे. ग्रामस्थांचा हा निर्णय म्हणजे लोकशाहीसाठी एक ऐतिहासिक पाऊल आहे, असे म्हटले आहे.
संपूर्ण राज्यासाठी मार्गदर्शक
पारदर्शक मतदान प्रक्रियेसाठी बॅलेटपेपरची मागणी हे नागरिकांच्या आत्मविश्वासाचे प्रतीक आहे, अशी चर्चा सर्वत्र होत आहे. ग्रामसभेतील निर्णयामुळे टिवरी ग्रामपंचायत फक्त वसई किंवा पालघर जिल्ह्यासाठीच नाही तर संपूर्ण राज्यासाठी एक मार्गदर्शक ठरू शकते.
