उद्योगपती गौतम अदानी यांच्यावर अमेरिकेत लाच आणि फसवणुकीचा आरोप लगावण्यात आले आहेत. न्यूयॉर्कच्या फेडरल कोर्टाने अटक वॉरंट जारी केल्यानंतर अदानी समूहाचे शेअर्स 20 टक्क्यांहून अधिक कोसळले. यामुळे गुंतवणूकदारांमध्ये घबराट पसरलेली असताना आता अदानी समूहाने सारवासारव करत पहिली प्रतिक्रिया दिली आहे.
‘यूएस डिपार्टमेंट ऑफ जस्टिस आणि यूएस सिक्युरिटीज अँड एक्सचेंज कमीशनद्वारा अदानी ग्रीनच्या संचालकांविरुद्ध लावण्यात आलेले सर्व आरोप निराधार आहेत. यूएस डिपार्टमेंट ऑफ जस्टिसने स्वतः म्हटल्याप्रमाणे, अभियोगातील आरोप हे केवळ आरोप आहेत. जोपर्यंत दोषी सिद्ध होत नाही तोपर्यंत प्रतिवादी निर्दोष मानले जातात. आम्ही यावर सर्व ते कायदेशीर उपाय करत आहोत’, असे स्पष्टीकरण अदानी समूहाने पत्रक जारी करत दिले आहे.
