महाराष्ट्रात मराठी भाषेचा सन्मान झालाच पाहिजे. मराठी माणसाच्या विरोधात वक्तव्य केल्याची कल्याणमधील घटना दुर्दैवी आहे. मराठी माणसाच्या विरोधात वक्तव्य करून मस्ती दाखवली गेली, पण ही मस्ती आपल्याला ठेचून काढावीच लागेल, असा इशारा शिवसेना नेते व शिवसेना विधिमंडळ पक्षाचे नेते आदित्य ठाकरे यांनी आज विधानसभेत दिला.
मिंधे-भाजपचे सरकार आल्यापासून गेल्या अडीच वर्षांतच मराठी-अमराठी, जाती-जाती आणि समाजासमाजांत वादांना प्रोत्साहन दिले जात आहे का, असा प्रश्न पडतो. गृहनिर्माण सोसायटीत मराठी माणसाला परवानगी दिली गेली नाही. मागच्याच महिन्यात दक्षिण मुंबईत मराठीत नाही मारवाडीत बोला, असे मराठी महिलेला बजावले गेले. आता भाजपचे राज्य आले आहे. तुम्हाला मारवाडीतच बोलावे लागेल, असे व्यापाऱ्याने दरडावले. तेव्हा राज्य कोणाचेही असो, पण हा महाराष्ट्र, आमची मुंबई, आमचे नागपूर, आमचे पुणे… हा प्रत्येक जिल्हा मराठी माणसाचाच आहे.
मुंबई आधी आमच्या राज्याची राजधानी आहे, नंतर देशाची आर्थिक राजधानी आहे, असे आदित्य ठाकरे यांनी माध्यमांशी बोलताना ठणकावले. अनेक वेगवेगळ्या भाषेची लोकं आमच्या राज्यात वर्षानुवर्षे येत आहेत आणि मिळून मिसळून राहत आहेत. कुठेही कोणाला त्रास होत नव्हता. आनंदाने आमच्या राज्यात येऊन राहा, आमचे होऊन राहा, कोणालाही दुखवण्याचे कारण नाही. पण जेव्हा कोण कालसारखे आमच्यावर मस्ती, माज दाखवतो तर मग आमच्या तरुणांनी त्या न्यायाचा हात कसा असतो ते दाखवले तर पोलिसांनी मधे येऊ नये, असेही आदित्य ठाकरे म्हणाले. मराठी माणसाला एखाद्या सोसायटीत घर दिले जात नसेल तर त्या सोसायटीला ओसी देऊ नका, अशी मागणी त्यांनी केली.
महाराष्ट्रद्रोहाचा गुन्हा दाखल करा
एमटीडीसीमधील हा कोणीतरी आहे, जो काल मराठी माणसाला माज दाखवत होता, त्याला एकतर बडतर्फ करा आणि हे पार्सल जिथून आले आहे तिथे पाठवा, अशी मागणी करतानाच जर मुख्यमंत्री महाराष्ट्रप्रेमी असतील तर आमच्या मागणीला मान देऊन आरोपीवर महाराष्ट्रद्रोहाचा गुन्हा दाखल करतील, असे आदित्य ठाकरे म्हणाले.
