मूळची कर्नाटकची आणि पुण्यात आयटी कंपनीत नोकरीला असलेल्या तरुणीला शीतपेयातून गुंगीच्या गोळ्या देऊन तिच्यावर चौघांनी अनैसर्गिक अत्याचार केला. त्यानंतर तिचे फोटो व्हायरल करण्याची धमकी देत 30 लाख रुपये, दोन आयफोन उकळल्याचा धक्कादायक प्रकार उघडकीस आला आहे.
ही घटना कांदिवली मुंबईतील फॅब हॉटेल स्प्रिंगईन, मोटारीत घडली आहे. 33 वर्षीय तरुणीने काळेपडळ पोलीस ठाण्यात फिर्याद दिली आहे. तमीम हरसल्ला खान (रा. कांदिवली) आणि त्याचे इतर तीन मित्र अशा चौघांविरुद्ध बलात्कार, अनैसर्गिक कृत्य, फसवणूक, अपहार, धमकावून मारहाण अशा कलमान्वये गुन्हा दाखल केला आहे.
दरम्यान, हा प्रकार कांदिवली येथे घडल्यामुळे गुन्हा पुढील तपासासाठी कांदिवली पोलीस ठाण्याकडे वर्ग केला आहे. फेसबुकच्या माध्यमातून 2021मध्ये आरोपी खान याच्यासोबत तिची ओळख झाली होती. खानने त्याच्या वडिलांचा मोठा बांधकाम व्यवसाय असून तो पाहत असल्याची बतावणी केली. लग्नाच्या आमिषाने खानने तरुणीला जाळ्यात ओढले. तिच्यावर बलात्कार केल्यानंतर कारमध्ये नेऊन पुण्यातही अत्याचार केला. तरुणीवर कारमध्ये अत्याचार करत असताना त्याने तिघा मित्रांना बोलावून घेतले. तिघांनी तरुणीवर आळीपाळीने अनैसर्गिक अत्याचार केला. तरुणीचे फोटो सोशल मीडियावर व्हायरल करण्याची धमकी देत 10 लाख रुपये उकळले.
सख्ख्या बहिणींवर बलात्कार
किरकोळ वस्तूंची विक्री करून उदरनिर्वाह करणाऱ्या दोन अल्पवयीन सख्ख्या बहिणींवर बलात्कार झाल्याचा प्रकार 17 मार्चला शिवाजीनगर भागात घडला आहे. या प्रकरणी दोन अल्पवयीन मुलांसह त्यांना मदत करणाऱ्या महिलेविरुद्ध शिवाजीनगर पोलिसांनी गुन्हा दाखल केला आहे. पीडित मुलींच्या आईने फिर्यादी दिली आहे. पीडित मुली शिवाजीनगर भागात प्लास्टिक पिशव्या, पेन, फुले विक्री करतात. दोघी सख्या बहिणी असून त्यांचे कुटुंबीय फिरस्ते आहे. दरम्यान, शाळेत निघालेल्या मुलीला धमकावून तिच्यावर तरुणाने बलात्कार केल्याची घटना नगर रस्ता भागात घडली. या प्रकरणी वाघोली 23 वर्षीय तरुणाला अटक केली.
