वाशी नाका येथील ज्वेलर्सचे दुकान विकण्याच्या बहाण्याने दोघांनी मिळून एकाला एक कोटी 79 लाख रुपये घेऊन फसविण्याचा प्रकार समोर आला आहे. याप्रकरणी दोघांविरोधात गुन्हा दाखल करण्यात आला आहे.
नितीन भारसाकडे (37) हे फरसाण विक्रेते असून त्यांनी वाशी नाका येथील हिरा ज्वेलर्स नं. 6 व 7 हे विकत घेणार होते. यासाठी अश्विन जैन (42) आणि कविता रुपारेल (40) यांना एक कोटी 92 लाख रुपये रोखीने, आरटीजीएस तसेच धनादेशाद्वारे दिले.
दरम्यान इतके पैसे घेतल्यानंतर दोघांनी नितीन यांना दुकानाचा ताबा दिला नाही. त्यामुळे नितीन यांनी पैशांची मागणी केली असता दोघांनी त्यांना 13 लाख रुपये दिले. पण उर्वरित रक्कम न देता नितीन यांची फसवणूक केली. त्यामुळे नितीन यांच्या तक्रारीवरून पोलिसांनी जैन आणि रुपारेल यांच्या विरोधात गुन्हा दाखल केला आहे.
