वजन घटत चालले होते, अशक्तपणा वाढला होता. सततच्या जुलाबांमुळे ते हैराण झाले होते. जगण्याची आशाच सोडली होती. अशा परिस्थितीत कार्डियाक सर्जन डॉ. बिजॉय कुट्टी त्यांच्यासाठी देवदूत ठरले… डोंबिवलीतील रहिवासी 67 वर्षीय योगेश मेहता यांची ही कहाणी. मेहता यांच्या हृदयात लहान संत्र्याच्या आकाराचे ट्युमर आणि एका ठिकाणी ब्लॉकेज असल्याचे निदान झाले. ट्युमर काढण्याची अतिशय गुंतागुंतीची शस्त्रक्रिया यशस्वी करत डॉ. कुट्टी यांनी मेहता यांना नवजीवन दिले.
दहा लाखांमध्ये एकाला अशा प्रकारचा आजार होतो. योगेश मेहता यांना हृदयात मायक्सोमा नावाचा ट्युमर होता. राइट एट्रियल मायक्सोमा आणि सोबतच हृदयविकार अशा स्थितीत रुग्णांच्या जीवनमरणाचा प्रश्न निर्माण होतो. मेहता यांना ट्युमर आणि ब्लॉकेज अशा दुहेरी समस्येने ग्रस्त होते. मेहता हार्डवेअरचा व्यवसाय करत होते. सतत जुलाब आणि अशक्तपणामुळे डॉक्टरांनी त्यांच्या पोटाची तपासणी केली, मात्र नेमकी समस्या काय किंवा आजार काय याचे निदान होत नव्हते.
पाच तास चालली शस्त्रक्रिया
मुलुंडच्या प्लॅटिनियम रुग्णालयात मेहता यांच्यावर डॉ. बिजॉय कुट्टी यांच्या नेतृत्वाखाली तब्बल पाच तास शस्त्रक्रिया करण्यात आली आणि ट्युमर काढण्यात आले. मेहता यांना पुन्हा ट्युमर होणार नाही असे डॉक्टर कुट्टी यांनी सांगितले.
बिछान्यावर पडताच श्वासोच्छ्वासास त्रास
मेहता यांना बिछान्यावर पडताच श्वास घेण्यासाठी त्रास जाणवायचा. अनेकदा तर मेहता बेशुद्ध पडायचे. मेहता यांनी गेल्या दोन महिन्यांत अनेक डॉक्टरांना दाखवले, परंतु आजाराचे नेमके निदान होत नव्हते. अखेर हृदयात लहान संत्र्याच्या आकाराचे टय़ुमर असल्याचे आणि एका ठिकाणी ब्लॉकेज असल्याचे निदान झाले. त्यानंतर त्यांच्यावर शस्त्रक्रिया करण्याचा निर्णय घेतल्याचे डॉ. कुट्टी यांनी सांगितले.
ट्युमर मोठा झाल्याने धमन्यांवर दबाव
आजाराचे निदान होईपर्यंत ट्युमर मोठा झाला होता. त्यामुळे धमन्यांवर दबाव पडला. परिणामी हृदयाला होणारा रक्तपुरवठा कमी झाला आणि त्यांना चक्कर यायला लागले होते. मेहता 23 मार्च रोजी चक्कर येऊन पडल. त्यांना आयकॉन रुग्णालयात दाखल केले असता डॉ. कुट्टी यांनी मेहता यांना काही चाचण्या करण्यास सांगितले तेव्हा हृदयात ट्युमर असल्याचे निदान झाले.
