घरच्या मैदानावर खेळणाऱ्या कोलकताचा आवाज गुजरातने शांत केला. प्रथम फलंदाजी करताना आणि नंतर गोलंदाजी करताना गुजरातने दमदार खेळाचे प्रदर्शन करत 39 धावांनी सामना जिंकला. गुजरातने प्रथम फलंदाजी करताना 199 धावांचे आव्हान कोलकाताला दिले होते. साई सुदर्शन (52 धावा), शुभमन गिल (90 धावा) आणि जॉस बटलर (नाबाद 41 धावा) या तिघांनीच चौफेर फटकेबाजी करत 20 षटकांत 198 धावा चोपून काढल्या. आव्हानाचा पाठलाग करण्यासाठी उतरलेल्या कोलकाताची सुरुवात खराब झाली. पहिल्याच षटकात गुरबाज 1 धाव करत माघारी परतला. त्यानंतर टप्याटप्याने विकेट पडत गेल्या. कर्णधार अजिंक्य रहाणेने 36 चेंडूंमध्ये 50 धावा करत एकाकी झुंज दिली. परंतु इतर फलंदाजांची साथ न मिळाल्यामुळे संघाचा 39 धावांनी पराभव झाला.
