बेकायदा गावठी कट्टा (पिस्तूल) बाळगल्याप्रकरणी शाहूपुरी पोलिसांनी दोघांना मोळाचा ओढा येथून अटक केली. त्यांच्याकडून सव्वा लाखाचे पिस्तूल, दुचाकी असा मुद्देमाल जप्त करण्यात आला आहे. रवि रवींद्र जाधव (वय 23), रेवणसिद्ध भीमाअण्णा पुजारी (वय 27, दोघे रा. भुईंज, ता. वाई) अशी अटक केलेल्यांची नावे आहेत.
दुचाकीवर असणाऱ्या दोघांकडे पिस्तूल असल्याची व हे संशयित मोळाचा ओढा ते करंजे नाका या परिसरात असल्याची खात्रीलायक माहिती शाहूपुरी पोलिसांना मिळाली. त्यानुसार पोलिसांनी पथक तयार करून परिसर पिंजून काढण्यास सुरुवात केली. मोळाचा ओढा येथे दोघे पोलिसांना संशयितरीत्या दिसल्यानंतर त्यांनी थांबण्यास सांगितले. मात्र, पोलिसांना पाहताच पळून जाणाऱ्या दोघांना पोलिसांनी पकडले. संशयितांची अंगझडती घेतली असता, त्यांच्याकडे पिस्तूल सापडले. पोलिसांनी दोन्ही संशयितांना ताब्यात घेऊन त्यांच्याकडील पिस्तूल व दुचाकी असा सव्वा लाख रुपये किमतीचा मुद्देमाल पोलिसांनी जप्त केला.
पोलीस निरीक्षक सचिन म्हेत्रे यांच्या मार्गदर्शनाखाली गुन्हे प्रकटीकरण शाखेचे पोलीस अधिकारी कुमार ढेरे, पोलीस सुरेश घोडके, मनोज मदने, नीलेश काटकर, जोतिराम पवार, महेश बनकर, अभय साबळे, सचिन पवार, स्वप्निल सावंत, स्वप्निल पवार, सुमित मोरे, संग्राम फडतरे यांनी कारवाईत सहभाग घेतला.
