विविध अभियांत्रिकी व देखभालीची कामे करण्यासाठी रविवारी मध्य रेल्वेच्या मेन आणि ट्रान्स हार्बर लाईनवर मेगाब्लॉक घेण्यात आला आहे. मेन लाईनवर माटुंगा ते मुलुंड स्थानकांदरम्यान अप आणि डाऊन धीम्या मार्गावर सकाळी 11.05 ते दुपारी 3.55 वाजेपर्यंत ब्लॉक असेल. ब्लॉक काळात छत्रपती शिवाजी महाराज टर्मिनस येथून सकाळी 10.14 ते दुपारी 3.52 वाजेपर्यंत सुटणाऱ्या डाऊन धीम्या मार्गावरील सेवा माटुंगा आणि मुलुंड स्थानकांदरम्यान डाऊन जलद मार्गावर वळवल्या जातील. तसेच ठाणे येथून सकाळी 11.07 ते दुपारी 3.51 वाजेपर्यंत सुटणाऱ्या अप धीम्या मार्गावरील सेवा मुलुंड येथे अप जलद मार्गावर वळवल्या जातील. ट्रान्स हार्बरवर ठाणे ते वाशी/नेरुळ स्थानकांदरम्यान सकाळी 11.10 ते दुपारी 4.10 पर्यंत लोकल सेवा बंद राहील, असे मध्य रेल्वे प्रशासनाने कळवले आहे.
