57 व्या राष्ट्रीय अजिंक्यपद खो-खो स्पर्धेत महाराष्ट्राच्या महिला संघाने दिमाखदार खेळी करत विजेतेपदावर आपले नाव कोरले. अंतिम सामन्यात त्यांनी यजमान ओडिशावर 25-21 असा थरारक विजय मिळवला. दुसरीकडे पुरुष गटात रेल्वेच्या संघाने गतविजेत्या महाराष्ट्राला 36-28 अशी मात देत बाजी मारली. राष्ट्रीय खो-खो स्पर्धेतील महाराष्ट्राच्या महिलांचे हे 26 वे, तर रेल्वेचे 12 वे अजिंक्यपद ठरले आहे.
महाराष्ट्राच्या महिला भारी
पुरी येथील जिल्हा क्रीडा संकुलात पार पडलेल्या अंतिम सामन्यात महाराष्ट्राच्या महिला खेळाडूंनी शेवटच्या क्षणापर्यंत संघर्ष करत यजमान ओडिशाचा प्रतिकार मोडून काढला. सामन्याच्या मध्यंतराला दोन्ही संघ 10-10 अशा बरोबरीत होते, मात्र दुसऱया डावात महाराष्ट्राने अचूक रणनीती आणि दमदार संरक्षणाच्या जोरावर सामन्यावर वर्चस्व मिळवत विजयावर शिक्कामोर्तब केले. प्रियांका इंगळे, रेश्मा राठोड व अश्विनी शिंदे यांनी पहिल्या डावात तर तन्वी भोसले, संपदा मोरे आणि सानिका चाफे यांनी दुसऱया डावात उत्कृष्ट खेळ करत विजयात महत्त्वपूर्ण योगदान दिले. आक्रमणात रेश्माने 6 व प्रियांकाने 4 गडी बाद करत विजयात मोलाची भूमिका बजावली.
पुरुष गटात रेल्वेची विजयी पताका
पुरुष गटाच्या अंतिम सामन्यात रेल्वेने महाराष्ट्रावर 36-28 अशी निर्णायक मात करत अजिंक्यपद आपल्या नावावर केले. मध्यंतराला रेल्वेने 21-12 अशी निर्णायक आघाडी घेत सामन्यावर नियंत्रण मिळवले. दुसऱया डावात महाराष्ट्राने 15-15 अशी जोरदार मुसंडी मारली, पण रेल्वेने पाहिल्या डावात घेतलेली आघाडी महाराष्ट्राच्या पराभवाचे कारण ठरली. रेल्वेकडून अरुण गुणकी, राहुल मंडल, दिलीप खांडवी, जगन्नाथ दास व महेश शिंदे यांनी अष्टपैलू कामगिरी करत संघाला विजय मिळवून दिला. महाराष्ट्राच्या संघाकडून लक्ष्मण गवस आणि मिलिंद चावरेकर यांनी प्रत्येकी 1.40 मि. संरक्षण करत विजयासाठी जोरदार प्रयत्न केले होते. पियूष घोलमने 6 गुण मिळवत, तर निहार दुबळे, रुद्र थोपटे आणि सुयश गरगटे यांनी प्रत्येकी 4 गुण मिळवत विजयासाठी केलेले प्रयत्न अपुरे पडले व महाराष्ट्राला उपविजेतेपदावर समाधान मानावे लागले.
