गोरेगावच्या मोतीलाल नगरच्या पुनर्विकासात एक आदर्श टाऊनशिप तयार केली जाईल. येथील रहिवाशांवर कोणताही अन्याय होऊ देणार नाही. सर्व सोयींनीयुक्त हक्काची घरे प्रत्येकाला मिळणार, अशी हमी मुख्यमंत्री देवेंद्र फडणवीस यांनी शिष्टमंडळाला दिली .
गोरेगावमधील मोतीलाल नगरच्या पुनर्विकासाबाबत हायकोर्टाने निकाल दिला आहे. 142 एकरवर ‘म्हाडा’ मार्फत हा पुनर्विकास होणार आहे. या विकासात रहिवाशांच्या हक्कांचे रक्षण व्हावे, या प्रकल्पात रहिवाशांना विश्वासात घ्यावे, संपूर्ण पारदर्शकता असावी या मागण्यांबाबत मुख्यमंत्र्यांनी सकारात्मक प्रतिसाद दिला.
सविस्तर अहवाल तयार करण्याचे ‘म्हाडा’ला आदेश
1600 बिल्टअप आकाराच्या घरांऐवजी रहिवाशांनी दोन हजार कार्पेट चौरस फुटांची मागणी केली आहे. याबाबत रहिवाशांच्या इतर मागण्यांचे निवेदन मुख्यमंत्र्यांना देण्यात आले आहे. या शिष्टमंडळात युवराज मोहिते यांच्यासह किरण निरभवणे, तरसेमसिंग सोहल, मिलिंद अडांगळे, गौतम कांबळे, अलीम खान, अमित काकडे, विजय पोवळे आदी रहिवासी सहभागी होते. मुख्यमंत्र्यांनी यासंदर्भात सविस्तर अहवाल तयार करण्याचे आदेश ‘म्हाडा’ला दिले आहेत.
