कोलंबिया विद्यापीठात डॉक्टरेटची विद्यार्थिनी असलेल्या रंजनी श्रीनिवास (वय – 37) हिचा व्हिसा अमेरिकेने काही दिवसांपूर्वी रद्द केला होता. हमास या दहशतवादी संघटनेला पाठिंबा दिल्याचा आरोप तिच्यावर करण्यात आला होता. त्यामुळे सुरक्षेच्या कारणास्तव तिचा व्हिसा रद्द करण्यात आल्याचे अमेरिकेच्या गृह विभागाने म्हटले होते. यानंतर रंजनीने ‘सेल्फ डिपॉर्ट’ (स्वत:हून देश सोडण्याचा निर्णय) होण्याचा निर्णय घेतला होता. आता रंजनीने तिच्यावर ओढावलेला प्रसंग कथन केला असून कोलंबिया विद्यापीठाने माझा विश्वासघात केला असा आरोप केला आहे.
कोलंबिया विद्यापीठामध्ये मी 5 वर्ष काम काम केले. मला आठवत नाही, मी कधीकधी आठवड्यातून 100 तासांहून अधिक कामही केले. पण मला कधीच वाटले नव्हते की ही संस्था मला निराश करेल, पण तसे झाले, असे रंजनी श्रीनिवासन ‘अल जझीरा’ला दिलेल्या मुलाखतीमध्ये म्हणाली. मला आशा आहे कोलंबिया विद्यापीठाचे डोळे उघडतील आणि ते मला पुन्हा प्रवेश देतील. अर्थात माझ्या पीएचडीसाठीची सर्व प्रक्रिया पूर्ण झालेली आहे आणि ते काही बाकी आहे त्यासाठी मला अमेरिकेमध्ये राहण्याचीही गरज नाही, असेही ती म्हणाली.
रजनी श्रीनिवासन ही अमेरिकेतील कोलंबिया विद्यापीठातून पीएचडी करत होती. एफ-1 स्टुडंट व्हिसावर तिला अमेरिकेमध्ये प्रवेश मिळाला होता. मात्र हमास या दहशतवादी संघटनेला पाठिंबा देणाऱ्या कारवायांमध्ये ती सहभागी असल्याचा ठपका ठेवत 5 मार्च रोजी तिचा व्हिसा रद्द करण्यात आला होता. यानंतर तिने ‘सेल्फ डिपॉर्ट’ होत कॅनडा गाठले आहे.
‘त्या’ दिवशी नक्की काय घडलं?
5 मार्च रोजी अमेरिकेच्या वाणिज्य दूतावासाकडून मला विद्यार्थी व्हिसा अनिश्चित काळासाठी रद्द करण्यात आल्याचा ई-मेल मिळाला. कोलंबिया विद्यापीठातील अधिकाऱ्यांशी आणि पीएचडी गटासोबत संपर्क करून नक्की काय घडले हे जाणून घेत असतानाच माझ्या घरी युनायटेड स्टेट्स इमिग्रेशन आणि कस्टम्स एन्फोर्समेंटचे एजंट आले. पण मी दरवाजा उघडला नाही. त्यानंतर दुसऱ्या दिवशी सायंकाळीही एजंट आले, तेव्हा मी घरी नव्हते.
काही तासानंतर कोलंबियातील महमूद खलील या विद्यार्थ्याला कोलंबिया विद्यापीठातून ताब्यात घेण्यात आले. यामुळे विद्यार्थ्यांमध्ये खळबळ उडाली. अटकेच्या भीतीने मी आवश्यक कागदपत्र, वस्तू आणि मौल्यवान वस्तू घेऊन तिथून पळ काढला. एजंट सतत शोध घेत असताना 11 मार्च रोजी त्यांना चकवा देऊन न्यूयॉर्कहून कॅनडा गाठले. तिथे नातेवाईक, मित्रांशी संपर्क साधला आणि मदत मिळवली, असे रजनीने सांगितले.
