14 मार्च 2025 हा कार्ल मार्क्स यांचा 142 वा स्मृतिदिन आहे. मार्क्स यांच्या मृत्यूप्रसंगी त्यांना आदरांजली वाहणारे अप्रतिम भाषण 17 मार्च 1883 रोजी त्यांचे अत्यंत जिवलग मित्र कॉम्रेड फ्रेडरिक एंगेल्स यांनी लंडनच्या हायगेट स्मशानभूमीत केले होते. त्यानंतर दरवर्षी 14 मार्च या त्यांच्या स्मृतिदिनानिमित्त मार्क्स स्मृती व्याख्यान लंडनच्या हायगेट स्मशानभूमीत आयोजित केले जाते. त्याचे आयोजन गेली अनेक वर्षे ब्रिटिश कम्युनिस्ट पक्ष आणि लंडनची मार्क्स मेमोरियल लायब्ररी संयुक्तपणे करतात. जगभरातील कम्युनिस्ट नेते आणि मार्क्सवादी विचारवंतांना हे व्याख्यान देण्यासाठी आमंत्रित केले जाते.
यंदा 2025 चे मार्क्स स्मृती व्याख्यान देण्याचा मान मार्क्सवादी कम्युनिस्ट पक्षाचे पॉलिट ब्युरो सदस्य आणि अखिल भारतीय किसान सभेचे राष्ट्रीय अध्यक्ष डॉ. अशोक ढवळे यांना मिळाला आहे. समाजसत्तावादी क्युबाच्या ब्रिटनमधील राजदूत इस्मारा वर्गास वॉल्टर या सुद्धा असेच व्याख्यान तेथे देतील. ब्रिटनमधील मार्क्सवादी कम्युनिस्ट पक्षाच्या 15-16 मार्च रोजी होणाऱ्या त्रैवार्षिक अधिवेशनासही डॉ. अशोक ढवळे हे पॉलिट ब्यूरोतर्फे हजर राहून संबोधित करतील.
