पाटोदा पोलीस ठाण्यात कार्यरत असलेला पोलीस कर्मचारी उद्धव गडकर याने एका महिलेवर बलात्कार केल्याची घटना जागतिक महिला दिनी म्हणजे 8 मार्च रोजी पाटोदा येथे घडली. या प्रकरणात गुन्हा दाखल झाल्यानंतर पोलीस अधीक्षक नवनीत कांवत यांनी पोलीस कर्मचारी उद्धव गडकर याच्यावर आज रविवारी तडकाफडकी निलंबनाची कारवाई केली.
एकीकडे जगभरात महिला दिन उत्साहात साजरा करत असताना बीडमधून एक धक्कादायक बातमी समोर आली आहे. महिला दिनाच्या दिवशीच बीडमध्ये पोलीस कर्मचाऱ्याने बलात्कार केल्याची धक्कादायक घटना समोर आली आहे. यामुळे बीड पोलीस दलात खळबळ उडाली असून आरोपीला अटक करण्यात आली आहे. बीडच्या पाटोदा पोलीस ठाण्यात कार्यरत असलेल्या कर्मचाऱ्यानेच तक्रार देण्यासाठी आलेल्या महिलेची ओळख करत बलात्कार केल्याची घटना घडली. उद्धव गडकर असे या नराधम आरोपी पोलीस कर्मचाऱ्याचे नाव आहे. या प्रकरणात पाटोदा शहर पोलीस ठाण्यात गुन्हा दाखल करण्यात आला असून आरोपीला अटक केल्याची माहिती ठाणे प्रमुख सोमनाथ जाधव यांनी दिली.
पोलिसांबद्दल रोष
सामान्य नागरिकांचे संरक्षण करण्याची ज्याच्यावर जबाबदारी असते तो पोलीस खात्यातील कर्मचारीच भक्षक बनल्याने मोठी खळबळ उडाली आहे. बीडमध्ये मागील काही दिवसांपासून पोलिसांचा वचक कमी होत चालल्याचे दिसत आहे. काही प्रकरणांत पोलिसांचीच गुन्हेगारांसोबत उठबस असते, त्यामुळे सामान्य नागरिकांमध्ये प्रतिमा मलिन होत चालली आहे. त्यातच आता हा प्रकार समोर आला आहे. त्यामुळे सामान्य नागरिकांमध्ये पोलिसांबद्दल रोष निर्माण झाला आहे.
