हिंदुस्थानचे आराध्य दैवत छत्रपती शिवाजी महाराजांना वंदन करण्यासाठी प्रतिवर्षीप्रमाणे यंदाही शिवसेनाप्रणीत स्थानीय लोकाधिकार समिती महासंघाने भव्यदिव्य शिवराय संचलन शुक्रवार, 7 मार्च रोजी दुपारी 3 वाजता भारतीय रिझर्व्ह बँक अमर बिल्डिंग, फोर्ट येथे आयोजित केले आहे. यानिमित्ताने संपूर्ण फोर्ट परिसरात शिवकालीन, भगवेमय वातावरण पाहायला मिळेल. संचलनाच्या मार्गावर ठिकठिकाणी फटाक्यांची आतषबाजी केली जाईल तसेच ‘जय भवानी जय शिवाजी’, ‘छत्रपती शिवाजी महाराज की जय’ अशा घोषणांनी संपूर्ण परिसर दुमदुमणार आहे. शिवसेना पक्षप्रमुख उद्धव ठाकरे या वेळी प्रमुख मार्गदर्शन करणार आहेत. प्रमुख अतिथी म्हणून शिवसेना नेते, युवासेना प्रमुख आदित्य ठाकरे हेदेखील उपस्थित राहणार आहेत.
शिवराय संचलनाचा शुभारंभ उद्धव ठाकरे यांच्या हस्ते होईल. या शिवराय संचलनामध्ये स्थानीय लोकाधिकार समिती महासंघाशी संलग्न असलेल्या सर्व समित्यांचे पदाधिकारी, कार्यकर्ते आणि आस्थापनामधील कर्मचारी बंधू व भगिनी तसेच शिवसेनेच्या सर्व अंगीकृत संघटनांचे सर्व पदाधिकारी आणि कार्यकर्ते मोठय़ा संख्येने उपस्थित राहणार आहेत. या दिवशी सर्व आस्थापनातील लोकाधिकार समितीचे कार्यकर्ते संचलन मार्ग परिसरात भगवेमय वातावरण करणार आहेत.
स्थानीय लोकाधिकार समिती महासंघाचे अध्यक्ष, खासदार अनिल देसाई, महासंघ कार्याध्यक्ष, माजी आमदार विलास पोतनीस, आमदार सुनील शिंदे, सरचिटणीस प्रदीप मयेकर तसेच शिवसेनेचे सर्व नेते, उपनेते, लोकप्रतिनिधी, पदाधिकारी, विभागप्रमुख, महिला विभाग संघटक हे आपल्या कार्यकर्त्यांसह यावेळी उपस्थित राहणार आहेत. फोर्ट परिसरामध्ये मराठी माणसांचा ठसा उमटवणाऱ्या भव्यदिव्य शिवराय संचलनात सर्व शिवप्रेमींनी मोठय़ा संख्येने सामील व्हावे, असे आवाहन अनिल देसाई यांनी केले आहे.
संपूर्ण परिसर होणार भगवामय
या संचलनाला छत्रपती शिवाजी महाराजांची प्रतिमा फुलांनी आकर्षक सजावट केलेल्या ट्रकमध्ये स्थापन करण्यात येणार असून संचलनाच्या मार्गावर भगवे झेंडे, पताका, बॅनर लावून वातावरण भगवेमय करण्यात येणार आहे. यासाठी शिवसेना दक्षिण मुंबईचे विभागप्रमुख संतोष शिंदे यांचे सहकार्य लाभले आहे. शिवराय संचलनात भगव्या टोप्या, गमजे घालून संचलनात कार्यकर्ते सामील होतील व भगव्या नऊवारी साडय़ा प्रधान करून महिला मोठय़ा संख्येने सहभागी होणार आहेत.
असा असणार मार्ग
संचलनाच्या मार्गावरील हुतात्मा स्मारकास मानवंदना देऊन पुष्पचक्र अर्पण करण्यात येईल. तसेच श्यामाप्रसाद मुखर्जी चौक (म्युझियम) येथील वंदनीय हिंदुहृदयसम्राट शिवसेनाप्रमुख बाळासाहेब ठाकरे यांच्या पुतळ्यास पुष्पहार अर्पण करण्यात येईल. शिवराय संचलनाचा समारोप हिंदुस्थानचे प्रवेशद्वार (गेटवे ऑफ इंडिया) येथील छत्रपती शिवरायांच्या पूर्णाकृती पुतळ्यास पुष्पहार अर्पण करून मानवंदना देऊन करण्यात येईल.
लेझीम, ढोलताशा पथक आणि शिवकालीन मर्दानी खेळांची प्रात्यक्षिके पाहण्याची संधी
दुपारी 3 वाजता भारतीय रिझर्व्ह बँक अमर बिल्डिंग फोर्ट येथून ढोल ताशाच्या गजरात व तुतारीवादनाने प्रमुख अतिथी यांच्या उपस्थितीत शिवराय संचलनाला सुरुवात होईल. फुलांनी सुशोभित केलेल्या वाहनात सिंहासनारूढ छत्रपती शिवाजी महाराजांचा पुतळा असेल तसेच फुलांनी सजवलेली शिवपालखी वाहून येणारे मावळे असतील. पालखीसोबत वारकरी भजन पथक असेल. विशेष आकर्षण म्हणजे दानपट्टा, ढाल तलवार, लाठीकाठी, बाराबनाटी, चौरंग चक्र यासारख्या शिवकालीन मर्दानी खेळांची प्रात्यक्षिके सादर केली जातील. याशिवाय ढोलताशा पथक, नाशिक बाजा, लेझीम पथक असणार आहे.
शिवराय संचलन
ः स्थळ ः
भारतीय रिझर्व्ह बँक (फोर्ट) ते गेटवे ऑफ इंडिया
ः वेळ ः
शुक्रवार, 7 मार्च रोजी दुपारी 3 वाजता
