हिंदवी स्वराज्याचे संस्थापक छत्रपती शिवाजी महाराज यांच्या 395 व्या जयंतीचे औचित्य साधत कोल्हापूरच्या पाच वर्षांच्या शिवकन्येने हिमालय पर्वत रांगेतील केदारकंठा हे शिखर सर करुन शिवरायांना अभिवादन केले आहे. क्षणाक्षणाला बदलणारे वातावरण, उणे 6 ते 15 अंश सेल्सिअस तापमान, रक्त गोठविणारी थंडी, निसरड्या बर्फातून मार्ग आणि ऑक्सिजनची कमतरता अशा शारीरिक कस दाखविणाऱ्या प्रतिकूल परिस्थितीत हार न मानता समुद्रसपाटीपासून 15 हजार 500 फूट उंचीवर असलेले केदारकंठा हे शिखर सर करुन अन्वीने स्वराज्याचा भगवा शिखरावर फडकवला. तिच्या या धाडसाच सर्व स्तरातून कौतुक केलं जात आहे.
कोल्हापूरच्या या जागतिक विक्रमवीर गिर्यारोहक कु. अन्वी अनिता चेतन घाटगे (वय 5 वर्षे) हिने शिवजयंतीच्या (19 फेब्रुवारी 2025) दिवशी हे केदारकंठा शिखर सर करून शिखरावर शिवजयंती साजरी केली. यावेळी तिने शिखरावर स्वराज्याचा भगवा फडकवला, तसेच छत्रपती शिवाजी महाराज यांच्या प्रतिमेचे पूजन केल. त्याचबरोबर शिवजयंती म्हणजे विचारांचा जागर… धीरता, वीरता असून गडकोट संवर्धन करूयात, शिवजयंती दिवशी डॉल्बीचा वापर टाळूयात, असा संदेश तिने दिला. तसेच गारद देऊन आणि हर हर महादेव, जय भवानी जय शिवराय, अशा घोषणा देत परिसर दणाणून सोडला.
रविवारी (16 फेब्रुवारी 2025) देहरादून ते साक्री असा 210 कि.मी.चा प्रवास करुन अन्वीने सोमवारी (17 फेब्रुवारी 2025) रोजी साक्रि येथून मुख्य चढाईस सुरुवात केली. उणे -6° अंश सेल्सिअस तापमान, रक्त गोठवणारी थंडी, शिखरावर चढाई करत असताना होणारी ऑक्सिजनची कमतरता, बर्फावरील निसरडी वाट अशा प्रतिकूल परिस्थितीत 2 दिवसाची चढाई करत अन्वी 18 फेब्रुवारी रोजी बेस कॅम्पवर पोहोचली. 19 फेब्रुवारी रोजी मध्यरात्री दोन वाजता पुन्हा शिखरावर चढाई करण्यास सुरुवात केली. अंधारातून बर्फाच्छादित मार्गातून वाट काढत, निसरड्या बर्फावरून उणे -15 ° अंश सेल्सिअस तापमानात अत्यंत धैर्याने व आत्मविश्वासाने, शारीरिक व मानसिक क्षमतेचा कस लावून चढाई करत अन्वी सकाळी 7 च्या सुमारास सूर्योदयाला शिखरावर पोहोचली.
केदारकंठा या बर्फाच्छादित शिखरावर 12 हजार 500 फूट उंच व उणे -15° अंश सेलसिअस तापमानामध्ये स्वतः चढाई करणारी व परत साक्री येथे पोहोचणारी अन्वी ही जगातील सर्वात लहान गिर्यारोहक ठरली आहे. अन्वीचा हा सहावा जागतिक विक्रम असून लवकरच त्याची नोंद वर्ल्ड रेकॉर्डमध्ये होणार आहे. अन्वीच्या या विक्रमाबाबत शिवा ॲडव्हेंचर चे फाउंडर प्रमोद राणा व युवा वर्ल्डचे तेजस जिबकाठे यांनी प्रमाणपत्र दिले आहे.
यापुर्वी अन्वीच्या नावे गिर्यारोहण क्षेत्रात 5 वर्ल्ड रेकॉर्ड, 6 एशिया बुक ऑफ रेकॉर्ड, 6 इंडिया बुक ऑफ रेकॉर्ड नोंदवले असून, तीने 62 गडकोट दुर्ग संवर्धन व स्वच्छता मोहीम केले आहेत. तसेच 250 हून अधिक व्यक्ती, संस्था व संघटना यांनी अन्वीला सन्मानित केले आहे. अन्वीने 2 हजार 100 देशी झाडांची लागवड केली आहे. या मोहिमेत प्राध्यापक अनिल मगर, प्रशिक्षक व आई अनिता घाटगे, वडील चेतन घाटगे, गाईड मनोज राणा व इतर गिर्यारोहक सहभागी झाले होते.
