फुटबॉल समान्यादरम्यान फटाक्यांमुळे घडलेली अपघाताची घटना ताजी असतानाच आता केरळमध्ये दुसरी घटना घडली आहे. कन्नूरमध्ये एका मंदिरात फटाके फोडताना झालेल्या दुर्घटनेत पाच जण जखमी झाले. जखमींमध्ये 12 वर्षांच्या मुलाचाही समावेश आहे. एका जखमीची प्रकृती गंभीर असून त्याला उपचारासाठी मंगळुरु येथील रुग्णालयात हलवण्यात आले आहे.
कन्नूर जिल्ह्यातील अझेकोड नीरकावू येथील मुचिरियन मंदिरात शुक्रवारी पहाटे 4 वाजता थेय्यमचा कार्यक्रम आयोजित करण्यात आला होता. यावेळी फटाके फोडण्यात येत होते. यावेळी हवेत स्फोट होणारा एक फटाका गर्दीत पडला आणि फुटला. यामुळे पाच जण जखमी झाले. याप्रकरणी वलपट्टणम पोलीस अधिक तपास करत आहेत.
