तोरणा या गडावर गिर्यारोहणासाठी गेलेल्या एका पर्यटकाचा हृदयविकाराच्या झटक्याने मृत्यू झाला. शनिवारी म्हणजेच 8 फेब्रुवारीला ही घटना घडली. रणजीत मोहनदास शिंदे असे या पर्यटकाचे नाव आहे. हा पर्यटक मूळचा सातारा जिल्ह्यातील सोनगावचा रहिवासी होता. तो सध्या वारजे या ठिकाणी राहत होता. फजीलत खान आणि रणजीत शिंदे असे दोघेजण तोरणा गडावर गेले होते.
या दोघांनी 8 फेब्रुवारीच्या रात्री 11च्या दरम्यान तोरणा किल्ल्यावर जाण्यास सुरुवात केली होती. ते विशिष्ट अंतरावर पोहचले तेव्हा रणजीतला चक्कर आली आणि तो बेशुद्ध झाला. बेशुद्ध झाल्यानंतर फजीलतने रणजीतला खाली आणण्यासाठी आपत्ती व्यवस्थापन पथकाशी संपर्क साधला.
पोलीस हवालदार रोहित मरभळ, युवराज सोमवंशी यांच्यासह आपत्ती व्यवस्थापन पथकाचे तानाजी भोसले, गणेश सपकाळ, संदीप सोलस्कर, अनिल रेणुसे हे गडावर पोहचले. त्यांनी बेशुद्ध रणजीत शिंदेला खाली आणेपर्यंत पहाटेचे पाच वाजले होते. त्यावेळी 108 क्रमांकाची रुग्णवाहिका थांबली होती. डॉ. राहुल बोरसे, चंद्रकांत भोईटे, ज्ञानेश्वर हिरास यांनी शिंदेला मृत घोषित केलं.
