प्रयागराजमध्ये सुरू असलेल्या महाकुंभमेळ्यादरम्यान मौनी अमावस्येच्या अमृत स्नानादरम्यान झालेल्या चेंगराचेंगरीनंतर हॉटेल बुकिंगमध्ये मोठी घट झाली आहे. महाकुंभमधील दुर्घटनेचा हॉटेल व्यावसायिकांना मोठा फटका बसला आहे. वसंत पंचमीच्या स्नानानंतर बुकिंग पुन्हा वाढेल अशी आशा हॉटेल व्यावासायिकांनी व्यक्त केली आहे.
हॉटेल मालक प्रवाशांना सांगत आहेत की परिस्थिती आता पूर्णपणे सामान्य आहे आणि ते कोणतीही चिंता न करता महाकुंभमेळ्याला येऊ शकतात. अनेक हॉटेल मालक स्वतः संभाव्य ग्राहकांशी संपर्क साधत आहेत आणि त्यांना येण्यास प्रोत्साहित करत आहेत. हॉटेल व्यावसायिकांनी सांगितले की, 29 जानेवारीच्या दुर्घटनेनंतर, बुकिंगमध्ये मोठी घट झाली कारण अनेक भाविक त्यांच्या हॉटेलमध्ये पोहोचू शकले नाहीत. आता परिस्थिती सामान्य झाली आहे आणि आम्ही भाविकांना वसंत पंचमी स्नानानंतर येण्याचे आवाहन करत आहोत जेणेकरून त्यांना कोणतीही अडचण येऊ नये.
हॉटेल व्यावसायिकांनी सांगितले की, 28 जानेवारी ते 30 जानेवारी दरम्यान अनेक यात्रेकरूंना शहराच्या सीमेवर थांबवण्यात आले होते. त्यामुळे ते त्यांच्या हॉटेलपर्यंत पोहोचू शकले नाहीत. चेंगराचेंगरीची बातमी पसरताच, मोठ्या संख्येने लोकांनी त्यांचे बुकिंग रद्द केले. या दुर्घटनेमुळे हॉटेलमधील 40 ते 50 टक्के खोल्या रिकाम्या राहिल्या. या घटनेनंतर अनेक हॉटेलमधील 25 टक्के बुकिंग रद्द करण्यात आली आहेत. आम्ही लोकांना वसंत पंचमी स्नानानंतर येण्याची विनंती करत आहोत कारण तोपर्यंत शहरातील वाहनांची वाहतूक सामान्य होईल.
या दुर्घटनेचा शहरातील हॉटेल उद्योगावर खोलवर परिणाम झाला आहे. आमची चिंता फक्त बुकिंग रद्द होण्याबद्दल नाही तर ज्या प्रवाशांनी आगाऊ पैसे दिले होते पण ते येथे पोहोचू शकले नाहीत त्यांच्याबद्दल देखील आहे. प्रवाशांना किमान त्यांच्या हॉटेलपर्यंत पोहोचता यावे यासाठी प्रशासनाकडून चांगल्या व्यवस्था करण्याची मागणी त्यांनी केली. महिला, मुले आणि जड सामान असलेल्या प्रवाशांना शहराच्या हद्दीपासून 15-20 किमी चालण्यास सांगणे अव्यवहार्य होते, असेही अनेक हॉटेल मालकांनी सांगितले.
