मुंबईतील कुर्ला एलबीएस मार्गावरील एका भंगाराच्या दुकानाला भीषण आग लागली आहे. घटनास्थळी अग्निशमन दलाच्या 5 गाड्या दाखल झाल्या आहेत. या आगीत अद्याप कोणतीही जीवितहानी झाल्याचे वृत्त नाही. गेल्या 15 दिवसात दुसऱ्यांदा कुर्ला एलबीएस मार्गावर आगीची घटना घडली आहे.
मिळालेल्या माहितीनुसार, एलबीएस मार्गावरील एका दुकानात आधी आग लागली. त्यानंतर आगीने रौद्ररूप धारण केलं आणि इतर दुकानातही ती पसरली. घटनास्थळी अग्निशमन दलाच्या 5 गाड्या दाखल झाल्या असून अग्निशमन दलाच्या जवानांकडून आग विझवण्याचे प्रयत्न सुरू आहे. दरम्यान, एलबीएस मार्ग हा वर्दळीचा रास्ता असून येथे आग लागल्यामुळे मोठ्या प्रमाणात वाहतूक कोंडी झाली आहे. या आगीत भंगार व्यावसायिकांचं लाखोंचं नुकसान झालं असल्याचं बोललं जात आहे.
