बीडमधील सरपंच संतोष देशमुख हत्या प्रकरणातील आरोपी सुदर्शन घुलेला 14 दिवसांची न्यायालयीन कोठडी सुनावण्यात आली आहे. डिजिटल इव्हिडन्सच्या आधारे प्रकरणाच्या चौकशीसाठी सुदर्शन घुले याला पाच दिवसाची एसआयटी कोठडी देण्यात आली होती. ही कोठडी संपल्याने घुलेला आज पुन्हा न्यायालयात हजर करण्यात आले.
बीड मकोका न्यायालयात व्हिडिओ कॉन्फरन्सद्वारे सुदर्शन घुलेला हजर करण्यात आले होते. यावेळी सरकारी वकील ॲड.बाळासाहेब कोल्हे यांनी न्यायालयीन कोठडीची मागणी केली. ही मागणी न्यायालयाने मान्य केली. मात्र या प्रकरणात केव्हाही पोलीस कोठडी घेण्याचा अधिकार तपास यंत्रणेला असणार आहे, असेही न्यायालयाने स्पष्ट केले.
