आपल्या स्पष्टवक्तेपणासाठी प्रसिद्ध असलेली बॉलिवूड अभिनेत्री स्वरा भास्कर (Swara Bhaskar) हीचं X अकाऊंट कायमचं बंद करण्यात आलं आहे. याबाबत स्वरा भास्करने इन्स्टाग्रामवर (Instagram) पोस्ट शेअर करत माहिती दिली आहे. X ने तिच्या दोन वेगवेगळ्या पोस्टने कॉपीराइटचे उल्लंघन केल्याचा दावा केल्याचं म्हटलं आहे. त्यामुळे X ने तिचं थेट अकाऊंट कायमचे बंद केल्यानं तिनं इन्स्टावरून नाराजी व्यक्त केली आहे.
स्वरानं म्हटलं आहे की, मला दोन वेगवेगळ्या पोस्टसाठी कॉपीराईट उल्लंघन केल्याचा इशारा आला होता. यानंतर माझं अकाऊंट कायमचं बंद करण्यात आलं आहे, असं तिच्या पोस्ट मध्ये म्हटलं आहे. स्वराने 26 जानेवारीला आणि गुरुवारी 30 जानेवारीला पोस्ट केली होती. त्याचा स्क्रीनशॉट तिनं इन्स्टावर पोस्ट केला आहे. 26 जानेवारीला तिनं तिच्याच मुलीचा तिरंगा घेतलेला फोटो पोस्ट केला होता. तर गुरुवारी तिने गांधी हम शर्मिंदा हैं, तेरे कातिल अभी जिंदा है, असं टेक्स्ट असलेला फोटो पोस्ट केला होता. या दोन्हीवर कॉपीराईट उल्लंघन केल्याचा दावा केला आहे. यावरून तिनं नाराजी व्यक्त केली आहे.
महात्मा गांधींबाबतचा हा नारा एक प्रगतीशील आंदोलनाचा लोकप्रिय नारा आहे. त्यात कॉपीराईटच्या उल्लंघनाची गोष्ट येते कुठून? असा सवाल तिनं केला आहे. याचबरोबर दुसरा फोटो माझ्या मुलीचा आहे. त्यात तिचा चेहरा लपविलेला आहे. ती देशाचा झेंडा फडकवत आहे. माझ्या मुलीच्या फोटोवर कोणाचा कॉपीराईट आहे असाही सवाल तिने केला आहे. हे हास्यास्पद असून या दोन्ही पोस्ट कोणत्याही कॉपीराईटच्या व्याख्येत येत नाहीत. या दोन्ही ट्विटना मास रिपोर्ट करण्यात आले आहे. हा मला त्रास द्यायचा प्रयत्न आहे. माझ्या अभिव्यक्ती स्वातंत्र्याची ही गळचेपी आहे. X ने कृपया हे पहावे आणि आपला निर्णय बदलावा, असं स्वरानं म्हटलं आहे.
दरम्यान, स्वराचं ट्विटर हँडल इतरांना जरी दिसत असलं तरी ती ते लॉगिन करू शकत नाही.
