उत्तर प्रदेशचे मंत्री संजय निषाद यांनी बुधवारी महाकुंभ नगरातील चेंगराचेंगरीबद्दल दुःख व्यक्त केलं. मात्र त्यापुढे म्हटले की, ‘एवढ्या मोठ्या कार्यक्रमात “छोट्या घटना” घडत असतात’. त्यांच्या अशा विधानामुळे देशभरातून संताप व्यक्त होत आहे. अशा प्रकारचं विधान म्हणजे बेजबाबदारपणा असल्याच्या प्रतिक्रिया लोकांकडून येत आहेत.
निषाद हे निषाद पक्षाचे प्रमुख आणि योगी आदित्यनाथ सरकारमधील मत्स्यव्यवसाय मंत्री आहेत.
‘एवढ्या मोठ्या कार्यक्रमात आणि जेव्हा एवढी मोठी गर्दी असते तेव्हा किरकोळ घटना घडतात’, असं ते म्हणाले.
मुख्यमंत्री आदित्यनाथ या प्रकरणाची चौकशी करत आहेत अशी माहिती त्यांनी दिली. तसंच जिथे जागा मिळेल तिथे स्नान करा आणि अफवांवर विश्वास ठेवू नये, असं आवाहन त्यांनी भाविकांना केलं.
समाजवादी पक्षाचे प्रमुख अखिलेश यादव यांनी महाकुंभात गैरव्यवस्थापनाच्या आरोपा केले आहेत. त्याबद्दल विचारले असता निषाद यांनी त्यावर विधान करणं टाळलं.
‘ज्या व्यवस्था केल्या आहेत आणि तिथे असलेली गर्दी जगात कुठेही नसेल. जिथे एवढी मोठी व्यवस्था केली जाते आणि एवढी मोठी गर्दी जमते, तिथे काही लहान घटना कुठेतरी घडतात’, या मतावर ते ठाम होते.
‘ही घटना आमच्यासाठी दुःखद आहे आणि भविष्यात असं कधी घडू नये अशी माझी इच्छा आहे. आम्ही लोक आणि संपूर्ण सरकार अगदी सतर्क आहोत’, असं त्यांनी सांगितलं.
महाकुंभ नगरीत चेंगराचेंगरी झाली ज्यामध्ये 30 जणांचा मृत्यू झाला आणि 60 जण जखमी झाले आहेत.
