हिमाचल प्रदेशच्या ऊना जिल्ह्यात एक विचित्र घटना समोर आली आहे. पंजाबमधील एका महिला मध्यस्थाने एका व्यक्तीची फसवणूक केली. लग्न जुळल्याचे सांगून सोशल मीडियावरून मुलीचा फोटो त्या व्यक्तीला आणि त्याच्या नातेवाईकांना दाखवून लग्न ठरवले. मात्र त्यानंतर असे काही झाले की, नवरदेवाला पोलिसात धाव घेण्याची वेळ आली. सध्या पोलीस या घटनेचा तपास करत आहेत.
नारी वरच्या गावातील या तरुणाची शेजारी झालेल्या लग्नात एका लग्न जुळवणाऱ्या महिलेशी ओळख झाली. ती महिला पंजाबची होती. बोलता बोलता त्या तरुणाने लग्न करायचे असून वधूच्या शोधात असल्याचे सांगितले. त्यावेळी त्या महिलेने सिंगा गावातील एका गरीब कुटुंबातील तरुणीचा फोटो दाखवला आणि तरुणाला मुलगी पसंत आल्यावर लग्नही ठरवले. काही दिवसांनी त्या महिलेने लग्न ठरवल्याबाबत 50 हजार रुपये घेतले आणि सांगितले की, वधूपक्ष साध्या पद्धतीने लग्न करणार आहे. 28 जानेवारी रोजी लग्नाची तारीख ठरली आणि महिलेने सिंगा गावात वरात घेऊन जाण्यासाठी आमंत्रण दिले. मंगळवारी सकाळी नारी वरच्या गावातून लग्नाची मिरवणूक सिंगा गावात पोहोचली. लग्नाच्या मिरवणुकीत सहभागी असलेले 90 लोक सिंगा येथे पोहोचले तेव्हा सगळे काही शांत होते. नवरदेवाच्या स्वागतासाठी कोणीच नव्हते. त्यावेळी तिथे ना तिचे घर सापडले, ना ती सापडली. विशेष म्हणजे जिने हे लग्न जुळवले ती महिलाही गायब होती.
लग्न जुळवणाऱ्या महिलेशी फोनवरुन संपर्क साधला असता ती टाळाटाळ करायला लागली. तिने सांगितले ती मुलगी विष प्यायली त्यामुळे तिला पंजाबमधील नवांशहर येथे नेण्यात आले. त्यानंतर पंचायत घरात लग्नाची मिरवणूक बसली. वराचे वडील काही लोकांसह पंचायत प्रधान येथे पोहोचले तेव्हा त्यांना मंगळवारी सिंगा गावात कोणाचेच लग्न नसल्याचे कळले. नवरदेवाच्या वडिलांच्या तक्रारीवरून पोलिसांनी तपास सुरू केला आहे. नवरदेवाच्या वडिलांनी दाखवलेल्या फोटोसारखी गावात कोणतीच मुलगी नव्हती. हे प्रकरण हरोली पोलिसात पोहोचले. अखेर संध्याकाळी नवरदेवाला वधूशिवाय लग्नाची मिरवणूक घेऊन घरी परतावे लागले. आरोपी महिलेने यापूर्वीही अनेक तरुणांचे लग्न जुळविण्याच्या नावाखाली लाखो रुपयांची फसवणूक केली आहे.
