हिंदुस्थानात 90 तास कामाची चर्चा सुरू असताना ब्रिटनमध्ये कर्मचाऱ्यांना आठवडय़ाला तीन दिवसांची सुट्टी घोषित झाली. काही दिवसांपूर्वी एल अँड टी कंपनीचे संचालक एस. एन. सुब्रमण्यम यांनी कर्मचाऱ्यांनी रविवारी सुट्टीच्या दिवशीदेखील काम केले पाहिजे, अगदी 90 तास काम केले पाहिजे, असे वक्तव्य केले. या वक्तव्यानंतर नव्या चर्चेला तोंड फुटले.
सुब्रमण्यम यांच्या वक्तव्यावर अनेकांनी नाराजी व्यक्त केली. ही चर्चा सुरू असतानाच ब्रिटनमधील 200 कंपन्यांनी आपल्या कर्मचाऱ्यांना चार दिवस काम आणि तीन दिवस सुट्टी अशी भेट दिलीय. या कंपन्यांमध्ये पाच हजारांहून अधिक कर्मचारी आहेत. चार दिवसांचा कामाचा आठवडा असला तरी कर्मचाऱ्यांचा पगार कमी केला जाणार नाही. फाऊंडेशन कॅम्पेनचे संचालक जोइ राईल म्हणाले, 9 ते 5 या वेळेत आठवडय़ाचे पाच दिवस काम करणे ही पद्धत 100 वर्षांपूर्वी स्वीकारण्यात आली होती. ती आजच्या काळासाठी योग्य नाही. 50 टक्के अधिक मोकळा वेळ, आठवडय़ातून चार दिवस काम केल्याने कर्मचाऱ्यांना आनंदी आणि अधिक परिपूर्ण जीवन जगण्याचे स्वातंत्र्य मिळेल.
ब्रिटनमध्ये याआधी आठवडय़ातून चार दिवस कामाचे ही संकल्पना जाहिरात, विपणन आणि प्रेससंबंधित कंपन्यांनी स्वीकारली आहे. आतापर्यंत एकूण 200 कंपन्यांनी चार दिवसांच्या कामकाजाच्या आठवडय़ाचा नियम लागू केला आहे, ज्यामध्ये लंडनमधील 59 कंपन्यांनी पुढाकार घेतला आहे.
ब्रिटनमध्ये कोविड महामारीच्या काळापासून कामाच्या तासामध्ये बदल करण्यात आले. 2022 मध्ये अनेक कंपन्यांनी चार दिवसांचा आठवडा लागू केला. तसेच अनेक कंपन्यांनी हायब्रिड मॉडेलदेखील स्वीकारले आहे. ऑस्ट्रेलिया, बेल्जियम, नेदरलॅंड, डेन्मार्कसह काही देशांमध्ये आधीपासूनच कामाचा आठवडा चार दिवसांचा आहे.
