सध्याच्या जमान्यात स्मार्टफोन आपल्या आयुष्याचा गरजेचा भाग बनला आहे. स्मार्टफोनचा वापर केवळ कॉलिंगसाठी नव्हे तर अनेक महत्त्वाच्या गोष्टी स्टोर करण्यासाठी किंवा ऑनलाईन पेमेंटसाठी होतो. स्मार्टफोन जर हरवला तर खासगी डेटा आणि बँकिंग इन्फॉर्मेशनचा गैरवापर केला जाण्याची भीती असते. ही भीती दूर करण्यासाठी गुगलने आता नवीन सिक्योरिटी फीचर आणले आहे.
काही दिवसांपूर्वी गुगलने अँटी थेफ्ट फीचर लाँच केले होते. या फीचरअंतर्गत जर कुणी तुमचा फोन खेचला तर तो त्वरित लॉक करणे शक्य होते. त्यामुळे चोर लॉक झालेला फोन अॅक्सेस करू शकणार नाही. हे फीचर खूप उपयुक्त असले तरी चोराला जर तुमचा पासवर्ड किंवा पिन माहिती असेल तर मोठे नुकसान होऊ शकते. यावर तोडगा म्हणून गुगलने नवीन फीचर आणलंय. या फीचरचे नाव आयडेंटिटी चेक असे आहे. या फीचरमुळे तुमच्या डिव्हाइसमध्ये अजून एक सिक्योरिटी अपडेट मिळते. आयडेंटिटी चेक हे फीचर नावाप्रमाणे युजरची आयडेंटिटी चेक करेल. म्हणजे तुमच्या फोनमधील डेटा अॅक्सेस करण्यासाठी तुम्हीच फोन वापरत असल्याची खात्री करून घेईल. त्यासाठी फिंगरप्रिंट व फेस रेकग्नेशन असा बायोमॅट्रिक डेटा तपासला जाईल.
गुगलच्या नवीन आयडेंटिटी चेक फीचरमध्ये तुम्ही काही सेफ लोकेशनदेखील जोडू शकता. जर एखाद्या लोकेशनपासून फोन दूर गेल्यास फोन आयडेंटिटी चेक मागेल. जर तुम्ही सेफ लोकेशन्सवर असाल तर तुम्हाला सहज डेटा अॅक्सेस करता येईल.
गुगलच्या फीचरमुळे लाखो अॅंड्रॉईड युसर्जला दिलासा मिळेल. आयडेंटीटी चेक फीचर ऑन असताना बायोमेट्रीक
ऑथेंटीकेशनशिवाय डिव्हाईसचा पिनकोड कुणाला बदलता येणार नाही. सिक्युरिटी फीचर बंद करू शकत नाही. हे फीचर केवळ अल्ट्रासोनिक किंवा ऑप्टिकल इन-डिस्प्ले फिंगरप्रिंट सेन्सर आणि थ्रीडी फेस रेकग्निशन असलेल्या डिव्हाइसला समर्थन देईल.
