दिंडोशीच्या रहेजा गार्डन येथील रहदरीमुक्त रस्त्यावर शिवसेनेतर्फे रविवारी ‘स्वेट ऑन स्ट्रीट 5.0’ या कार्यक्रमाचे आयोजन करण्यात आले होते. तब्बल साठपेक्षा अधिक उपक्रमांमध्ये सहभाग घेत आबालवृद्धांनी कार्यक्रमाचा मनमुराद आनंद घेतला. चिमुरडय़ांच्या कलागुणांचे दर्शन यावेळी घडले. दिंडोशीकरांचा उत्साह वाढवण्यासाठी शिवसेना नेते, युवासेना प्रमुख आदित्य ठाकरे यांचीदेखील या कार्यक्रमाला प्रमुख उपस्थिती होती.
मुंबईत कमी झालेली मैदाने, मोकळय़ा जागा नसल्यामुळे मुलांना खेळायला आणि त्यांच्या अंगी असलेल्या कलागुणांना वाव मिळत नाही. ही बाब लक्षात घेऊन युवासेना कार्यकारिणी सदस्य अंकित प्रभू यांच्या पुढाकाराने युवासेना, भारतीय विद्यार्थी सेना आणि स्वेट ऑन क्लब यांच्या वतीने दरवर्षी हा उपक्रम येथे राबवला जातो. कार्यक्रमाचे यंदाचे पाचवे वर्ष होते. यामध्ये सर्व वयोगटासाठी झुंबा, खेल-ओ-कबड्डी, कमांडोज-एक्स-फॅक्टर, रिंग फुटबॉल, जिम-फिट-मॅनिया, बिग साइज गेम्स, मिस्ट्री एस्केप रूम क्रिकेट, बुल राईड, 360 सेल्फी स्टॅण्ड, आर्ट स्टेशन, बॅडमिंटन, पूंग फू, कराटे, स्केटिंग, बुद्धिबळ असे वेगवेगळे खेळ तसेच व्यायाम व फिटनेस प्रकार, नृत्य, संगीत, चित्रकला, हस्तकला, पॅनव्हास पेंटिंग, थिएटर वर्कशॉप, योगाची प्रात्यक्षिके, एक्सपिरियन्स रूम, ब्रह्मकुमारीचे मानसिक स्वास्थ्य कसे मिळवायचे आणि आलेल्या अडचणींवर कसे मिळवायचे यावर उपाय आदी उपक्रम उपलब्ध होते. दरवर्षीप्रमाणे यंदाही या कार्यक्रमाचा आनंद रहेजा हाईट्स, वसंत व्हॅली, गोकुळ धाम, म्हाडा संकुल, न्यू म्हाडा, सॅटेलाईट कॉलनी, यशोधाम व्हॅलेंटाईन अपार्टमेंट, नागरी निवारा संकुल, सुचिधाम, दिंडोशी वसाहत, शिवशाही, श्रीकृष्ण नगर, संतोष नगर, कुरार गाव इत्यादी वसाहतीतील दिंडोशीवासीयांनी घेतला. दरवर्षी जमणारी गर्दी ही आम्ही हाती घेतलेल्या उपक्रमाची पोचपावती आहे, असे युवासेना कार्यकारिणी सदस्य अंकित प्रभू यांनी यावेळी नमूद केले.
शिवसेना नेते, शिवसेनेचे मुख्य प्रतोद आमदार सुनील प्रभू, शिवसेना उपनेते सचिन अहिर, शिवसेना सचिव साईनाथ दुर्गे, सुप्रदा फातर्पेकर, आमदार महेश सावंत, अनंत (बाळा) नर, पवन जाधव यांच्यासह सर्व शिवसेना, युवासेना पदाधिकारी, कार्यकर्ते यावेळी उपस्थित होते.
‘स्वेट ऑन स्ट्रीट’सारख्या मेगा स्ट्रीट फेस्टिव्हल मुंबईमधील गल्ल्या आणि रस्त्यावर आयोजित करण्यात यावेत. जेणेकरून मुंबईतील रस्त्यांवर मुंबईकर जनतेला मोकळा श्वास घेता येईल.
– आदित्य ठाकरे,
शिवसेना नेते, युवासेना प्रमुख
सेलिब्रेटींचाही मोठा सहभाग
‘स्वेट ऑन स्ट्रीट 5.0’ मध्ये ‘संगीत मानापमान’, ‘फसक्लास दाभाडे’, ‘ईलू इलू 1998’ या मराठी चित्रपटांचे प्रमोशन करण्यात आले. चित्रपट कलावंतांनी उपस्थितांसोबत संवाद साधला. यावेळी सुबोध भावे, सुमित राघवन, क्षिती जोग, अमेय वाघ, हेमंत ढोमे, एली आवराम, अंकिता दांडे यांच्यासह सोशल मीडिया इन्फ्ल्यून्सर उपस्थित होते.
