शिवसेनेतर्फे दक्षिण मध्य मुंबईत आयोजित करण्यात आलेल्या सांस्कृतिक, कला व खेळ महोत्सवाला शनिवारपासून सुरुवात झाली. शिवसेना नेते, युवासेना प्रमुख आदित्य ठाकरे यांच्या हस्ते छत्रपती शिवाजी महाराज मैदान येथे या महोत्सवाचे दिमाखात उद्घाटन झाले.
16 फेब्रुवारीपर्यंत हा महोत्सव सुरू राहणार असून या निमित्ताने दक्षिण मध्य मुंबईतील कला व क्रीडाप्रेमींना अनोखी संधी उपलब्ध झाली आहे.
हिंदुहृदयसम्राट शिवसेनाप्रमुख बाळासाहेब ठाकरे यांच्या जयंतीनिमित्त विविध स्पर्धा व उपक्रमांचा समावेश असलेला हा महोत्सव क्रीडा व सांस्कृतिकप्रेमींसाठी पर्वणी ठरणार आहे.
क्रिकेट (पुरुष), क्रिकेट (महिला), फुटबॉल, खो-खो, कुस्ती, टेबल टेनिस, कॅरम, रस्सीखेच, पंजा, बुद्धिबळ, कबड्डी, जिम्नॅस्टिक्स, मल्लखांब, योगासने, दहीहंडी तसेच चित्रकला स्पर्धा आणि बरेच काही यामध्ये सामील आहे.
महोत्सवाच्या उद्घाटनावेळी शिवसेना नेते दिवाकर रावते, शिवसेना सचिव साईनाथ दुर्गे, विभागप्रमुख आमदार महेश सावंत, माजी महापौर किशोरी पेडणेकर, श्रद्धा जाधव, समर्थ व्यायाम मंदिरचे उदय देशपांडे, मुंबई रणजी सलामीवीर आयुष म्हात्रे आदी उपस्थित होते.
