हिमाचल प्रदेशातील एका व्यक्तीला 200 कोटी रुपयांचे विजेचे बिल आले. बिल बघून व्यावसायिकाला मोठा धक्का बसला. त्याची झोपच उडाली.
ही घटना हमीरपूर जिह्यात बेहडवी जट्टा गावात घडली. ललित धिमान गावात विटा बनवण्याचे काम करतात. त्यांच्या नावावर 2 अब्ज 10 कोटी 42 लाख 8 हजार 405 रुपये एवढे विजेचे बिल आले. ही रक्कम नेमकी किती आहे, हेदेखील ललित यांना समजले. या धक्क्यातून सावरल्यानंतर ते तडक वीज कार्यालयात गेले. बिलाच्या यंत्रणेत तांत्रिक बिघाड झाल्याने काहीतरी गडबड झाल्याची कबुली वीज कर्मचाऱ्यांनी दिली. त्यानंतर तीन-चार तासांनी ललित यांना नवीन बिल देण्यात आले. त्यावर 4047 रुपये एवढी रक्कम होती. वीज कार्यालयाने आपली चूक मान्य केली आणि यापुढे अशी चूक होणार नाही याची खबरदारी घेऊ असे सांगून ललित यांना आश्वस्त केले.
