पत्रकार गौरी लंकेश यांच्या खुनातील आरोपील शरद काळसकरला कोर्टाने जामीन मंजूर केला आहे. लंकेश यांच्या खुनात 18 आरोपी होते. त्यापैकी काळसकरलाही जामीन मिळाल्याने सर्व आरोपी तुरुंगातून बाहेर आहेत तर काही आरोपी अद्याप फरार आहेत.
5 सप्टेंबर 2017 रोजी दोन जणांनी दुचाकीवर येऊन गौरी लंकेश यांना गोळ्या घातल्या होत्या. या खुनाप्रकरणी 18 जणांवर आरोप ठेवण्यात आले होते. त्यापैकी 18 वा आरोपी विकास पाटील हा तेव्हापासून फरार आहे. काळसकरवर आधीच नरेंद्र दाभोलकर यांच्या खुनाचा आरोप आहे. त्यामुळे सरकारी पक्षाने काळसकरच्या जामीन अर्जाला विरोध केला. पण कोर्टाने काळसकरला जामीन मंजूर केला. तसेच एवढ्या काळासाठी आरोपीला तुरुंगात ठेवणे हे त्याच्या संविधानात्मक हक्काचे उल्लंघन असल्याचे कोर्टाने म्हटले.
2023 साली कर्नाटक उच्च न्यायालयाने लंकेश यांच्या खुनातील आरोपींची जामिनावर सुटका केली होती. एन मोहनला सर्वात पहिल्यांदा जामीन मिळाला होता. त्यानंतर सर्वोच्च न्यायालयाने हा जामीन तसाच ठेवला. त्यानंतर भरत कुरणे, श्रीकांत पांगरकर, अमित दिघवेकर, केटी नवीन कुमार आणि सुरेश एच.एल या आरोपींना गेल्या वर्षी ऑक्टोबरमध्ये जामीन मिळाला. त्यानंतर बंगरुळू कोर्टाने आठ आरोपींना जामीन मंजूर केला. या आरोपींची सुटका झाल्यानंतर त्यांच्या गावी मोठ्या उत्साहात त्यांचे स्वागत केले गेले.
