यूपी योद्धाजने पहिल्या एलिमिनेटर लढतीत दोन वेळच्या विजेत्या जयपूर पिंक पँथर्सचा 46-18 असा 28 गुण फरकाने धुक्वा उडवत प्रो-कबड्डी लीगच्या इतिहासात प्रथमच उपांत्य फेरीत धडक दिली. भवानी राजपूत आणि गगन गौडाच्या चौफेर चढाया अन् हितेश, सुमित, महेंद्र सिंग या बचावफळीची तगडी साथ ही यूपी योद्धाजच्या विजयाची वैशिष्ट्ये ठरली. आता उपांत्य लढतीत त्यांच्यापुढे बलाढय़ हरियाणा स्टिलर्सचे कडवे आव्हान असेल.
बालेवाडीतील श्री शिवछत्रपती क्रीडा संकुलात सुरू असलेल्या युपी योद्धाज अन् जयपूर पिंक पँथर्स यांच्यातील बाद फेरीची लढत अगदीच एकतर्फी झाली. भवानी राजपूत आणि गगन गौडा यांनी खोलवर चढायांनी आक्रमक सुरुवात केली. त्याचवेळी त्यांचे बचावपटूही पूर्ण क्षमतेने साथ देत होते. यूपीच्या उंचपुऱ्या चढाईपटूंना रोखण्यात जयपूरला अपयश आले. पूर्ण सामन्यात दोन्ही सत्रांत प्रत्येकी दोन लोण असे चार लोण देत यूपीने जयपूर संघाची काsंडी केली. सुरजित सिंगचा अनुभव त्यांच्या मदतीला येऊ शकला नाही. सर्वात महत्त्वाचे म्हणजे जयपूरला केवळ अर्जुन देशवालवर अवलंबून राहावे लागले. मात्र, आज त्याला लयच गवसली नाही. चार चढायांत केवळ दोन गुण मिळविणाऱया अर्जुनला उत्तरार्धात बाहेर बसवण्याचा निर्णय घ्यावा लागला. त्यामुळे मध्यंतरातील 15 गुणांचे दडपण घेऊन उतरलेल्या जयपूर संघाला सामन्यात राहण्याचा मार्गच सापडला नाही. यूपीकडून भवानी राजपूतने 12, तर बचावात हितेश आणि सुमितने अनुक्रमे 6 आणि 5 गुणांची कमाई केली. त्यांना महेंद्र सिंगने चार गुण मिळवत सुरेख साथ केली.
यूपीने चढाईत 11 आणि बचावात 8 गुण मिळवले आणि दोन लोण चढवत मध्यंतरालाच 23-8 अशी मोठी निर्णायक आघाडी मिळवली होती. उत्तरार्धात फार वेगळे चित्र दिसले नाही. उत्तरार्धातील पहिल्या दहा मिनिटांत आणि दुसऱया दहा मिनिटांच्या सुरुवातीलाच लागोपाठ दोन लोण देत यूपीने सामन्याचा निकाल स्पष्ट केला. उत्तरार्धातील अखेरच्या सत्रातील सुरुवात झाली, तेव्हा यूपीची 26 गुणांची मोठी आघाडी होती. त्यामुळे यूपी योद्धाज किती मोठय़ा फरकाने विजय मिळविणार, इतकीच औपचारिकता बाकी राहिली होती.
