वरळी येथे रविवारी दुपारी एका स्विफ्ट कारचा अपघात झाला. कारने बसस्टॉपवर उभ्या असलेल्या लोकांना धडक दिली. यात सुदैवाने कुठलीही जीवितहानी झाली नाही, पण कारमधील चौघांसह दोघे पादचारी जखमी झाले.
रविवारी दुपारी एक वाजण्याच्या सुमारास वेगात असलेली स्विफ्ट कार वरळीच्या नेहरू तारांगण बस स्टॉपवर जाऊन धडकली. यावेळी तेथे उभ्या दोघांना कारची धडक बसली. त्यात अजय शहा (67) यांना दुखापत झाली तर मनोज चौधरी (50) यांचा डाव पाय फ्रॅक्चर झाला. याशिवाय कारमधील चारजणदेखील जखमी झाले. या जखमींवर नायर इस्पितळात उपचार सुरू असून वरळी पोलीस याप्रकरणी अधिक चौकशी करीत आहेत.
